ކްރިޕްޓޯކަރަންސީއާ ގުޅުންހުރި އެއްވެސް މަޝްރޫއެއްގައި އެމަނިކުފާނުގެ އެއްވެސް ބައިވެރިވުމެއް ނެތް ކަމަށާއި، އެކަމާ ގުޅޭގޮތުން ފަތުރަމުންދަނީ ހަގީގަތާ ހިލާފު ދޮގު މައުލޫމާތެއް ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މިކަމާ ގުޅޭގޮތުން ކަންބޮޑުވުން ފާޅުކުރައްވައި ޝާހިދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ކްރިޕްޓޯކަރަންސީއާ ގުޅުވައިގެން އެމަނިކުފާނުގެ ނަން ބޭނުންކޮށްގެން ފަތުރަމުންދާ ވާހަކަތަކަކީ ނުހަނު ކަންބޮޑުވާންޖެހޭ މައްސަލައެއް ކަމަށެވެ. އަދި އެފަދަ އެއްވެސް ކަމެއްގައި އެމަނިކުފާނުގެ އެއްވެސް ބައިވެރިވުމެއް ނޯންނާނެކަމުގެ ޔަގީންކަން ޝާހިދު ވަނީ ދެއްވާފައެވެ.
This is fake and deeply troubling.
I have no involvement in any cryptocurrency project.
My only engagement with Commonwealth Union was an interview on international affairs. I have told them not to use my name or image. https://t.co/zZWJ9qCdVN
— Abdulla Shahid (@abdulla_shahid) May 9, 2026
ޝާހިދު އިތުރަށް ސާފުކޮށްދެއްވި ގޮތުގައި، “ކޮމަންވެލްތު ޔޫނިއަން” އާއެކު އެމަނިކުފާނު މުއާމަލާތް ކުރެއްވީ ހަމައެކަނި ބައިނަލްއަގުވާމީ ދާއިރާއާ ގުޅޭ އިންޓަވިއުއެއް ދިނުމަށެވެ. އެ އިންޓަވިއުއާ ގުޅިގެންވެސް، އެމަނިކުފާނުގެ ނަމާއި ސޫރަ (ފޮޓޯ) އެއްވެސް އިސްތިހާރެއްގައި ނުވަތަ އެހެން ކަމެއްގައި ބޭނުން ނުކުރުމަށް އެ ފަރާތަށް ސަރީހަކޮށް އަންގާފައިވާނެ ކަމަށް ޝާހިދު ވިދާޅުވިއެވެ.
މި މައްސަލަ ފެންމަތިވެފައިވަނީ ޝާހިދުގެ ފޮޓޯ ބޭނުންކޮށްގެން ކްރިޕްޓޯކަރަންސީގެ ވިޔަފާރިއަށް ހިތްވަރުދޭ ފަދަ އިސްތިހާރުތަކެއް ސޯޝަލް މީޑިއާގައި ދައުރުވަމުންދާ ދަނޑިވަޅެއްގައެވެ. މިފަދަ އޮޅުވާލުންތަކަށް ސަމާލުވުމަށް ކަމާބެހޭ ފަރާތްތަކުން އަބަދުވެސް އިރުޝާދު ދެމުންދެއެވެ.
ކިޔުންތެރިންގެ ހިޔާލު