އޮންލައިން ނޫހެއް ކަމުގައިވާ “އަދަދު” ގެ އޮފީހަށް ފުލުހުން ވަދެ އެ ތަން ބަލައި ފާސްކުރުމާ ގުޅިގެން، އެމްޑީޕީގެ ރައީސް އަބްދުﷲ ޝާހިދު އެ އަމަލު ހަރުކަށި އިބާރާތުން ކުށްވެރިކުރައްވައިފިއެވެ.
ޝާހިދު މިކަން ކުށްވެރިކުރެއްވީ މީސްމީޑިއާގައި ކުރެއްވި ޕޯސްޓެއްގައެވެ. އެމަނިކުފާނު ވިދާޅުވީ، މިނިވަން ނޫސްވެރިކަމަށް ބިރުދެއްކުމަށް ސަރުކާރުން ކުރަމުންދާ މިފަދަ މަސައްކަތްތަކަކީ ނޫސްވެރިކަމުގެ މިނިވަންކަމަށާއި، މައުލޫމާތު ހޯދައި ލިބިގަތުމަށް ރައްޔިތުންނަށް އޮތް ހައްގަށް ދެވޭ ސީދާ ހަމަލާއެއް ކަމަށެވެ. އަދި މިއީ މިނިވަން މީޑިއާތައް ނައްތާލުމަށް ސަރުކާރުން ހިންގާ ވަރަށް ނުރައްކާތެރި އަމަލެއްގެ ގޮތުގައި ޝާހިދު ސިފަކުރެއްވިއެވެ.
Strongly condemn the raid on the @AdhadhuMV office. This blatant attempt by the government to intimidate independent media is a direct assault on press freedom and people's rights to be informed.
Press freedom is a cornerstone of democracy, not a privilege to be granted or…— Abdulla Shahid (@abdulla_shahid) April 27, 2026
ނޫސްވެރިކަމުގެ މިނިވަންކަމަކީ ޑިމޮކްރަސީގެ އެންމެ ވަރުގަދަ އެއް ތަނބުކަން ފާހަގަކުރައްވަމުން ޝާހިދު ވިދާޅުވީ، އެއީ ވެރިކަމުގައި ތިބޭ ބަޔަކު ބޭނުންވުމުން ދީފައި، ބޭނުން ނުވުމުން އަތުލެވޭނެ ފަދަ އިނާޔަތެއް ނޫން ކަމަށެވެ. އަދި މިނިވަން މުއައްސަސާތަކާއި ނޫސްވެރިންނަށް ބިރުދެއްކުމުގެ ސަގާފަތެއް ގާއިމުކުރުމަކީ ގައުމުގެ ޑިމޮކްރަސީ އެތައް އަހަރެއް ފަހަތަށް ގެންދާނެ ކަމެއް ކަމަށްވެސް އެމަނިކުފާނު ވިދާޅުވިއެވެ.
ފުލުހުން އަދަދު ނޫހުގެ އޮފީހަށް ވަދެފައިވަނީ ކޯޓު އަމުރެއްގެ ދަށުން އެ ނޫހުގެ ބައެއް ވަސީލަތްތައް ބަލައި ފާސްކުރުމަށެވެ. މި އަމަލަކީ ނޫސްވެރިންގެ މަސައްކަތަށް ހުރަސްއަޅައި، ސަރުކާރަށް ފާޑުކިޔާ ފަރާތްތަކުގެ އަޑު ކަނޑުވާލުމަށް ސިސްޓަމެޓިކްކޮށް ހިންގާ ކަމެއްގެ ގޮތުގައި ގިނަ ބަޔަކު ދަނީ ތުހުމަތުކުރަމުންނެވެ.
މި ހާދިސާއާ ގުޅިގެން ނޫސްވެރިންގެ ހައްގުތަކަށް ވަކާލާތުކުރާ ޖަމިއްޔާތަކުންނާއި ސިޔާސީ އެކި ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.
ކިޔުންތެރިންގެ ހިޔާލު