އެމްޑީޕީގެ ޗެއާޕާސަންގެ މަގާމަށް ވާދަކުރެއްވުމަށް ރައްޔިތުން މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމްގެ “އިތުބާރު” ކެމްޕޭން މިއަދު ރަސްމީކޮށް ލޯންޗުކޮށްފިއެވެ.
މީކާއިލް ކެމްޕޭން ޓީމުން މިއަދު ބޭއްވި ބޭއްވި ނޫސްވެރިންގެ ބައްދަލުވުމެއްގައި މީކާއިލް ވިދާޅުވީ އޭނާ ޕާޓީގެ ކަންކަން ކުރިއަށްގެންދާނީ އާންމު މެންބަރުން އެދޭ ގޮތަށް ކަމަށެވެ. މީކާއިލް ވިދާޅުވީ ޕާޓީގެ ލީޑާޝިޕާއި ގްރާސްރޫޓް މެންބަރުންނާ އޮތް ގުޅުން ކުޑަވެފައިވާތީ އެންމެ ބޮޑު އަމާޒަކީ އެ ގުޅުން އަލުން ބަދަހިކޮށް، މެންބަރުންގެ އިތުބާރު ހޯދުންކަމަށް މީކާއިލް ވިދާޅުވިއެވެ.
“އަޅުގަނޑުގެ ހިތުގައި އެއްވެސް ޝައްކެތް ނެތް މި އިންތިހާބު ކާމިޔާބު ކުރާނީ އިތުބާރު ކެމްޕޭން ކަން. އަދި އަޅުގަނޑުގެ ޗެއާޕާސަން ކަމުގައި 2028 ގެ ރިޔާސީ އިންތިހާބު އަޅުގަނޑުމެން ކާމިޔާބު ކުރާނަން،” މީކާއިލް ވިދާޅުވިއެވެ.
މީކާއިލް އެ މަގާމަށް ވާދަކުރެއްވުމަށް ނިންމަވާފައިވަނީ ޕާޓީގެ އިސް ބޭފުޅުންގެ ބޮޑު ތާއިދަކާ އެކުގައެވެ. އެގޮތުން ކުރީގެ ރައީސް އިބްރާހިމް މުހައްމަދު ސޯލިހާއި، އެމްޑީޕީގެ މިހާރުގެ ރައީސް އަބްދުالله ޝާހިދުގެ އިތުރުން ކުރީގެ ނައިބު ރައީސް ފައިސަލް ނަސީމާއި، އެމްޑީޕީގެ ޕާލިމެންޓްރީ ގްރޫޕްގެ ގިނަ މެންބަރުންގެ ތާއިދުވެސް އޭނާއަށް އޮތްކަން މީކާއިލް ވިދާޅުވިއެވެ.
ޗެއާޕާސަން އިންތިހާބުގައި މީކާއިލްގެ އިތުރުން ދެން ވާދަކުރައްވަނީ ކުރީގެ ރައީސް މުހައްމަދު ނަޝީދު އާއި ޕާޓީގެ ކުރީގެ ނައިބު ރައީސް އަލްހާން ފަހުމީއެވެ.
މީކާއިލަކީ 2024 ވަނަ އަހަރު ބޭއްވި މަޖިލީހުގެ އިންތިހާބުގައި އެމްޑީޕީއަށް ކާމިޔާބުކުރެވުނު މަދު ގޮނޑިތަކުގެ ތެރެއިން ގަލޮޅު ދެކުނު ދާއިރާގެ ގޮނޑި ދިފާއުކުރެއްވި މެންބަރެވެ. 2012 ވަނަ އަހަރުން ފެށިގެން އެމްޑީޕީގައި ހަރަކާތްތެރިވަމުން އަންނަ މީކާއިލް ވަނީ މީގެ ކުރިން އެ ޕާޓީގެ ޒުވާނުންގެ ހިތްވަރުގެ ރައީސްކަން ވެސް ކުރައްވާފައެވެ. އޭނާއަކީ މިހާރުވެސް ޕާޓީގެ ގައުމީ މަޖިލީހުގެ މެންބަރެކެވެ.
އެމްޑީޕީގެ އަސާސީ ގަވާއިދު ބުނާގޮތުން، ޗެއާޕާސަންގެ މަގާމަކީ ފަސް އަހަރުގެ ދައުރަކަށް އިންތިހާބުކުރާ، ޕާޓީގެ އެތެރޭގެ ހިންގުމާއި އިދާރީ ކަންކަން ރާވާ އިންތިޒާމުކުރާ އެންމެ އިސް މަގާމެވެ. މީގެ ތެރޭގައި ސަރުކާރާއި އެހެނިހެން ސިޔާސީ ޕާޓީތަކާއެކު މުއާމަލާތް ކުރުމާއި، ޕާޓީގެ ކޮންގްރެސް އާއި ގައުމީ މަޖިލީހުގެ ރިޔާސަތު ބެލެހެއްޓުން ފަދަ މުހިންމު ޒިންމާތައް ހިމެނެއެވެ.
ކިޔުންތެރިންގެ ހިޔާލު