ގދ. ތިނަދޫ ސިޓީގައި ބޭއްވި ޚާއްޞަ ޖަލްސާއެއްގައި، އެމްޑީޕީގެ ރައީސް ޢަބްދުﷲ ޝާހިދު ތިނަދޫ ސިޓީގެ މެނިފެސްޓޯ އާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (އ.ތ.މ.ކ) ގެ މެނިފެސްޓޯ ރަސްމީކޮށް އިފްތިތާޙުކޮށްދެއްވައިފިއެވެ.
ތިނަދޫގައި ބޭއްވި މި ޖަލްސާގައި ވާހަކަފުޅު ދައްކަވަމުން، މި ދެ މެނިފެސްޓޯ އިފްތިތާޙުކުރުމުގެ ޝަރަފު ލިބިވަޑައިގަތުމުން އެކަމަށްޓަކައި ޝާހިދު ވަނީ ވަރަށް ބޮޑަށް ޝުކުރު އަދާކުރައްވާފައެވެ. ޝާހިދު ވިދާޅުވި ގޮތުގައި، ދެންމެ ނެރުނު މެނިފެސްޓޯ އަކީ އަސްލު މީހުން ކަންތައް ކުރާ ގޮތެވެ. އަދި މި މެނިފެސްޓޯއަށް ބަލައިގެން، ސަރުކާރުން ކުރަމުންދާ ކަންކަން މި ބައްޓަމަށް ފައްތަން ދަސްކުރުމަށް ވެސް އެމަނިކުފާނު ވަނީ ސަރުކާރަށް ގޮވާލާފައެވެ.
ޝާހިދުގެ ވާހަކަފުޅުގައި އިތުރަށް ފާހަގަކުރެއްވި ގޮތުގައި، ކަންކަން ހިންގުމާއި، ކަންކަމަށް ފާޑުކިޔުމަކީ އިލްމީ ގާބިލް މީހުން ކަންކުރާ ގޮތެވެ. ތިނަދޫ ސިޓީގެ އެމްޑީޕީ ލީޑަޝިޕަށް ނުކުމެ ތިއްބެވި ކެނޑިޑޭޓުންނަށް ޝުކުރު އަދާކުރައްވައި، އެ ބޭފުޅުންނަށް އައްސަރިބަހާއި ސާބަސް ވަނީ ރައްދުކުރައްވާފައެވެ.
މިހާރުގެ ސަރުކާރަށް ފާޑުވިދާޅުވަމުން ޝާހިދު ވިދާޅުވީ، މެނިފެސްޓޯއެއް ލިޔެގެން އެ މެނިފެސްޓޯގައިވާ ކަންކަން ކުރާނެ ގޮތުގެ ހިސާބު ކިތާބު ޖަހައިގެން ގައުމު ހިންގަން މި ސަރުކާރަށް ނޭނގޭ ކަމަށެވެ. އަދި މިހާރުގެ ސަރުކާރުން ރައްޔިތުންގެ ލޮލުގައި އަނދުން އެޅުވުމަށް އެތައް ހާސް ބިންގަލެއް އަޅަމުންދާ ކަމަށާއި، ނަމަވެސް އެ ބިންގާތައް ހުރީ ގަލަށް ވެފައި ކަމަށް ޝާހިދު ވިދާޅުވިއެވެ.
ތިނަދޫގައި އަޅާނެ ކަމަށް ބުނި ފްލޯޓިންގ އެއަރޕޯޓަށް އިޝާރާތް ކުރައްވައި ޝާހިދު ވިދާޅުވީ، އެ މަޝްރޫޢު ވެސް އޮތީ “ގަލު އަޅާފައި” ނޫން ކަމެއް ވެސް ނޭނގޭ ކަމަށެވެ. އަދި ދައުރުގެ މެދާ ގާތްވާއިރު ވެސް އެ މަޝްރޫޢު ފްލޯޓްވާން (އޮޔާދާން) ވެސް ފަށާފައި ނުވާކަން ފާހަގަކުރެއްވިއެވެ. މީގެ އިތުރުން ބްރިޖްގެ މަސައްކަތާއި ހައުސިންގް މަޝްރޫޢުތަކާ ގުޅޭގޮތުން ވެސް ޝާހިދު ވަނީ ފާޑުވިދާޅުވެފައެވެ.
ވާހަކަފުޅު ނިންމަވާލައްވަމުން ޝާހިދު ވިދާޅުވީ، މި ނަގާ ރެފަރެންޑަމް ވޯޓުގައި ތިނަދޫއިން ވަނީ ސަރުކާރަށް “ނޫނެކޭ” ބޮޑުތަނުން ބުނެފައި ކަމަށެވެ.
ކިޔުންތެރިންގެ ހިޔާލު