ގ. ހިޔާރޯދިގޭގެއި ހިނގި އަލިފާނުގެ ހާދިސާއާ ގުޅިގެން މީހަކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.
ފުލުހުން މިރޭ މީޑިއާތަކަށް ފޮނުވި މެސެޖެއްގައި ބުނީ ހިޔާރޯދިގޭގެ ފުރަތަމަ ފަންގިފިލާގައި މިމަހުގެ 18 ވަނަ ދުވަހު ހިނގި އަލިފާނުގެ ހާދިސާއާ ގުޅިގެން މީހަކު ހައްޔަރުކޮށްފައިވަނީ އިއްޔެގެ ވަގުތެއްގައި ކަމަށެވެ.
އެ މައްސަލައިގައި ހައްޔަރުކޮށްފައިވަނީ ލ. މާބައިދޫ، ސަބުނަމްހައުސް، ހުސައިން ޝަހްބާން (29އ) ކަމަށް ފުލުހުން ބުންޏެވެ.
އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން ބަންދަށް ފަސް ދުވަސް ޖަހައިދީފައިވާ ކަމަށް ފުލުހުން ބުންޏެވެ.
ހިޔާރޯދިގޭގެއަކީ މީހުން ނޫޅޭ ގެއެކެވެ. އެ ގޭގައި ކަރަންޓެއްވެސް ނުހުރެއެވެ. އެ ގޭގައި އަލިފާނުގެ ހާދިސާ ހިނގާފައިވަނީ އެ ގެ ސާފުކުރުމުގެ މަސައްކަތް ކުރަމުން ދަނިކޮށެވެ.
ސޯޝަލް މީޑިއާގައިވަނީ ވަނީ އެ ގޭގައި އަލިފާން ރޯވުމުގެ ކުރިން މީހަކު އެ ގެއަށް ވަންނަ މަންޒަރު ފެންނަ ސީސީޓީވީ ފޫޓޭޖެއް އާންމުވެފައެވެ. އެ މީހާ އެ ގެއަށް ވެދައިވަނީ އަލިފާން ރޯވުމުގެ ހަތް ވަރަކަށް މިނެޓް ކުރިންނެވެ. އެ ގޭ މީހުން ތުހުމަތުކުރާ ގޮތުގައި އަލިފާން ރޯކޮށްފައިވަނީ އެ މީހާއެވެ.
ކިޔުންތެރިންގެ ހިޔާލު