ގދ. މަޑަވެލީގެ ގޮނޑުދޮށް ހިމާޔަތްކޮށް، ބިން ހިއްކުމުގެ މަޝްރޫއުގެ ދެވަނަ ފިޔަވަހީގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްފިއެވެ.
މި އެއްބަސްވުމުގައި ސޮއިކުރެއްވީ، ހައުސިން މިނިސްޓަރު ޑރ. އަބްދުﷲ މުއްތަލިބާއި އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީއެވެ.
އެމްޓީސީސީން ބުނި ގޮތުގައި، މި މަޝްރޫއުގެ ދަށުން، 19.17 ހެކްޓަރުގެ ބިންހިއްކައި ގޮނޑުދޮށް ހިމާޔަތްކުރުމުގެ މަސައްކަތް ކުރާނެއެވެ. އަދި، 1،645 މީޓަރުގެ ރިވެޓުމަންޓު ޖެހުމާއި 120 މީތަރުގެ ސަރަހައްދެއްފައި ގްރޮއިން ޖެހުމުގެ މަސައްކަތް ކުރާނެ ކަމަށް އެ ކުންފުނިން ވަނީ ބުނެފައެވެ.
ހަތަރު ސަތޭކަ ދުވަހުގެ ތެރޭގައި ނިންމާ ގޮތަށް އެ މަސައްކަތް އެމްޓީސީސީއާ ހަވާލުކުރީ، 174 މިލިއަން ރުފިޔާއަށެވެ.
ދެހާހަށްވުރެ ގިނަ މީހުން ދިރިއުޅޭ މަޑަވެއްޔަކީ، ޒަމާނުއްސުރެް ބޯހިޔާވަހިކަމުގެ ދަތިކަން ދިމާވެފައި އޮތް ރަށެކެވެ. ބިން ހިއްކައި، ގޮނޑުދޮށް ހިމާޔަތްކުރުމުގެ މަޝްރޫއު ނިމުމުން ރަށުގެ ބިން އިތުރުވެ، ބޯހިޔާވަހިކަމަށް އެދެވޭ ހައްލެއް ލިބޭނެ ކަމަށް އެމްޓީސީސީން ފާހަގަކުރިއެވެ.
އޭގެ އިތުރަށް، ގޮނޑުދޮށް ހިމާޔަތްކުރުމުގެ މަޝްރޫއު ނިމުމުން އުދަ އެރުމާއި ރަށް ގިރުމުގެ މައްސަަލައަށް ހައްލެއް އަންނާނެ ކަމަށް އެ ކުންފުނިން ގަބޫލުކުރެއެވެ.
ކިޔުންތެރިންގެ ހިޔާލު