ކަޅު ބާޒާރުގައި ޑޮލަރުގެ އަގު ބޮޑުތަނުން މަތިވެ، 20 ރުފިޔާއަށް ޑޮލަރު ވިއްކަން ފަށާފައިވާކަން ހަވާސާ ނޫހަށް އެނގިއްޖެއެވެ. މިގޮތުން، ވިޔަފާރިވެރިންނާއި އާންމުން ވެސް ޑޮލަރަށް ބޭނުންވެގެން، 20 ރުފިޔާ އަށް ވުރެ ބޮޑު އަގުގައި ޑޮލަރު ގަންނަމުންދާ ކަމަށް މައުލޫމާތު ލިބެއެވެ.
ޑޮލަރުގެ އަގު ދާނީ ދަށަށް ކަމަށާއި، ޑޮލަރުގެ މައްސަލައަށް ހައްލު ގެނެވޭނެކަމަށް ދާދި އިހަކަށް ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ. އެހެންނަމަވެސް، ރައީސް ވިދާޅުވި ގޮތާ ހިލާފަށް، ޑޮލަރުގެ އަގު މިހާރު ވަނީ ކުރިއަށް ވުރެވެސް މަތިވެފަ އެވެ. މިކަމަކީ އާންމުންގެ ކަންބޮޑުވުންތަކެއް އުފައްދާފައިވާ ކަމެކެވެ.
ޑޮލަރުގެ އަގު މަތިވުމާއެކު، ރާއްޖެއަށް އެތެރެކުރާ މުދަލުގެ އަގުތައް ބޮޑުތަނުން އުފުލިގެންދާނެ ކަމަށް އިގްތިސާދީ ތަޖުރިބާކާރުން ލަފާކުރެއެވެ. ރާއްޖެއަކީ ބޭރުން މުދާ އެތެރެކުރުމަށް ބަރޯސާވެފައިވާ ގައުމަކަށް ވުމުން، ޑޮލަރުގެ އަގު މަތިވުމަކީ އާންމު ރައްޔިތުންގެ ދިރިއުޅުމުގެ ހަރަދު އިތުރުވެ، ދިރިއުޅުމުގެ ފެންވަރު ދަށަށްދާނެ ކަމެކެވެ. މިކަމުގެ ސަބަބުން، ކާބޯތަކެއްޗާއި، ބޭހާއި، އަދި އެހެނިހެން އަސާސީ ބޭނުންތަކުގެ އަގުތައް ވެސް އުފުލި، ރައްޔިތުންނަށް އިތުރު ބުރައެއް އުފުލަން ޖެހިދާނެ ކަމެކެވެ.
ކިޔުންތެރިންގެ ހިޔާލު