‎މި ފަހަކަށް އައިސް މާލޭގައި ގިނަ މަރުތަކެއް ހިނގާ ވަނީ ބިރުވެރިކަމެއް ފެތުރިފައެވެ.

އެގޮތުން އެކި ތަންތާ މީހުން މަރުވެފައި ތިއްބާ ވަނީ ފެންނަން ފަށާފައެވެ. އެކަކު ގެއެއްގެ ތެރޭގައި މަރުވެފައި އޮތް އިރު އަނެކަކު ވޭނެއްގެ ތެރޭގައެވެ. އަނެކަކު ގެއްލިގެން ހޯދަމުން ދަނިކޮށް ފެނުނީ މަރުވެފައި އޮއްވައެވެ.

މިއީ އެއް މަސް ދުވަހުގެ ތެރޭގައި ހިނގާފައި ހުރި ހާދިސާތަކެވެ. ނަމަވެސް މިއިން އެއްވެސް މަރެއްގެ ހަގީގަތެއް އަދި ހޯދި ހާމަކޮށްފައިނުވެއެވެ

ކަން މިހެން ހުރިއިރު މިއީ ދައުލަތެއް ނުވަތަ ސްޓޭޓެއްގެ ލެވެލްއިން ބަލާނަމަ ވެރިން ކަންބޮޑުވާން ޖެހޭ ކަމެކެވެ. މީހުން މަރުވެފައި އެކި ތަންތަނުގައި ތިއްބާ ހަށިތައް ފެނުމަކީ އާންމު ކަމަކަށްވެއްޖެ ނަމަ އޭގެ ނުރައްކަލާ ބިރުވެރިކަން އެ މުޖުތަމައެއްގެ ތެރޭގައި ދާނީ އިތުރުވަމުންނެވެ.

ބިދޭސީއަކާ ދެ ދިވެހީން މަރުވެ ހާދިސާތަކެއް ހިނގާފައިވާއިރު ދައުލަތުގެ ވެރިޔަކު މިކަމާ ކަންބޮޑުވީ ހެންވެސް ހީނުވެއެވެ. އެކަންކަމާ މާ ބޮޑު ފަރުވާލެއް އެއްވެސް އިދާރާއަކުން ނުވަތަ މުއައްސަސާއަކުން ފާޅުކޮށްފައިވެސް ނުވެއެވެ.

ނަމަވެސް މިއީ ރައްޔިތުން ހައިސިއްޔަތުން ގައުމުގެ ޕަބްލިކު ނުހަނު ކަންބޮޑުވާނެކަމެއްކަން ޔަގީނެވެ. ސަބަބަކީ ކޮބައިކަން ނޭނގުނަސް ރައްޔިތުންގެ ހިތުގައި ބިރުވެރިކަން އިންތިހާއަށް އުފެދެން ޖާގަ ތަނަވަސްވެގެން ދެއެވެ. ނަމަވެސް ސުވާލަކީ މިއިން ކަމަކާ ދައުލަތުގެ އެއްވެސް ހިސާބަކުން ވިސްނާލިބާއެވެ. މިކަމުގެ ހުރި ކަންބޮޑުވުންތަކާ މެދު ވިސްނާލި ބާއެވެ؟ މިކަންކަން ހައްލުވާނެ ގޮތެއް ސަބަބު ހޯދާ ދެނަގަންނަން މަސައްކަތްކުރޭ ބާއެވެ؟