ދައުލަތުގެ މާކެޓިން ކުންފުނި، މޯލްޑިވްސް މާކެޓިން އެންޑް ޕީއާރް ކޯޕަރޭޝަން (އެމްއެމްޕީއާރްސީ) ގެ ބޯޑުގައި މަޓީ ތަމްސީލް ކުރައްވާ މެންބަރު ރާފިލް މުހައްމަދު އެ ކުންފުނިން އިސްތިއުފާ ދެއްވައިފި އެވެ.

އެމްއެމްޕީއާރްސީ ބޯޑު ޑިރެކްޓަރުކަމުން ރާފިލް އިސްތިއުފާ ދެއްވިކަން "ހަވާސާއަށް" އަށް ވަނީ ޔަގީން ކޮށްދެއްވެފަ އެވެ. އޭނާ މަގާމުން ވަކިވެވަޑައިގެންފައި ވަނީ މީގެ ދެ ހަފުތާއެއް ކުރިންނެވެ. އޭނާ އިސްތިއުފާ ދެއްވީ ކުންފުނީގެ ބޯޑުން ނިންމާފައިވާ ބައެއް ކަންތައްތަކާމެދު ހިތްހަމަ ނުޖެހިގެންނެވެ.

ރާފިލްއަކީ ރާއްޖޭގެ ރިސޯޓް އޯނަރުންގެ ޖަމިއްޔާ މަޓީގެ ފަރާތުން އެމްއެމްޕީއާރުސީ ބޯޑު ތަމްސީލް ކުރައްވަން ހުންނަވާ ބޭފުޅާ އެވެ.

އެމްއެމްޕީއާރުސީ ބޯޑުން ރާފިލް އިސްތިއުފާ ދެއްވިއިރު އިއްޔެ ވަނީ ޗެއާޕާސަން ނޫރެއިން ޖަނާ ވެސް އިސްތިއުފާ ދެއްވާފަ އެވެ. ދުނިޔޭގައި ވެސް މަޝްހޫރު ކަމެއް ހޯއްދަވާފައިވާ ނޫރެއިނަކީ ރާއްޖޭގެ މަޝްހޫރު ވިޔަފާރިވެރިޔާ މުހައްމަދު އަލީ ޖަނާހު ދަރިކަނބަަލުންނެވެ. ޖަނާއަކީ ރައީސް ޑރ. މުހައްމަދު މުއިއްޒުގެ ވަރަށް އަރިސް ރަހުމަތްތެރި ބޭފުޅެކެވެ. މީގެ އިތުރުން ޖަނާއަކީ ރައީސް މުއިއްޒުގެ އިންވެސްޓްމަންޓް އެޑްވައިޒަރުވެސް މެއެވެ.

ނޫރައިން ފާހަގަ ކުރެވިފައި ވަނީ ވަރަށް ނަމޫނާ ޒުވާނެއްގެ ގޮތުގަ އެވެ. ހާއްސަކޮށް ބަދަލަށް ވަކާލާތު ކުރައްވާ އެހެން މީހުންނަށް އެހީތެރިވެ ދެއްވުމުގައި އެއީ މިސާލެކެވެ. ހައްގުތަކަށް އަޑު އުފުއްލެވުމާއި އެހީގެ މަސައްކަތުގައި ޗެންޕިއަނެކެވެ. "ޔޫއެން ކޮމިޝަން އޮން ދަ ސްޓޭޓަސް އޮފް ވިމެން ސަމިޓް" ގައި އަންހެނުން މަސައްކަތުގެ މައިދާނުގައި ކުލަ ތަފާތު ނުކުރުމަށް ގޮވާލާ ނިއުޒިލެންޑް ތަމްސީލް ކުރެއްވީ ނޫރައިންނެވެ.

ނޫރައިން ވަނީ 2015 ވަނަ އަހަރު "ވެެއިޓްމަޓާ ލޯކަލް ބޯޑް ގޫޑް ސިޓިޒެން އެވޯޑް" ވެސް ހޯއްދަވާފަ އެވެ. އަދި ޒުވާން އަންހެނުންނަށް ކުރިއަށް ދާންވީ ރަނގަޅު ގޮތް ވިދާޅުވެ ދެއްވާ އެކަމުގައި ހިތްވަރުދެއްވާ ވަޒީފާގެ ތަމްރީން ބޭނުންވާ އަންހެނުންނަށް އެހީތެރިވާން ހާއްސަ ޖަމިއްޔާއެއް ވެސް އުފައްދަވާފަ އެވެ. "އޮތެންޓިސިޓީ އެން ޒެޑް" ގެ ނަމުގައި ހިންގާ ޖަމިއްޔާ އިން ވަޒީފާގެ ތަމްރީން ބޭނުންވާ އަންހެނުންނަށް އެހީތެރިވެ ދެއްވަ އެވެ.

ނިއުޒީލޭންޑްގެ ސިޔާސީ ފަރާތްތަކާއި ކަމާގުޅޭ އިދާރާތަކުގެ އިސް ވެެރިންނާއި މަަޝްވަރާކޮށް ހިޖުރަވެެރިންނަށް ނިއުޒީލޭންޑްގައި ކުރިމަތިވާ ގޮންޖެހުންތަކާ ދަތިތައް ސަމާލު ކަމަށް ގެނެސްދިނުމުގައި ނޫރައިން މުހިންމު ދައުރެއް އަދާ ކުރައްވާފައި ވެއެވެ. މީގެ އިތުރުން ނޫރެއިންއަކީ ނިއުޒިލޭންޑުގެ ފަގީރުންނަށް އެހީވާ ފަންޑް ނޯތް ޓްރަސްޓީސްގެ ފަރާތުން އާއްމުން ތަމްސީލް ކުރާ މެންބަރެކެވެ. ނޯތް ޓްރަސްޓީސް އިން ބުނެފައިވާ ގޮތުގައި ދިވެހިރާއްޖޭގެ ނޫރެއިންއަކީ ލީޑަރެކެވެ. މިއީ އެއް ބިލިއަން ޑޮލަރުގެ ބޮޑު ފަންޑެކެވެ. މަގާމުގައި ހޭދަކުރެއްވި މުއްދަތު ގައި ނޫރައިންނަށް އާންމުންގެ ބޮޑު ޝައުގުވެރިކަމަކާ އިހްތިރާމާއި ތާއީދު ވެސް ލިބުނެވެ.