މަސްވެރިން މަސް ކިރާތާ 48 ގަޑިއިރުގެ ތެރޭގައި ކިރާ މަހުގެ ފައިސާ ދިނުމަށް ވެފައިވާ ވައުދަށް ފަހު، ދާދި ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި ސުޕަމެޖޯރިޓީ ހޯދުމަށް ފަހު މަސްވެރިންނަށް ފައިސާ ދިނުމަށް ވެފައިވާ ވައުދުގެ މަތިން ސަރުކާރުން ވަނީ ހަނދާން ނައްތައިލަފި އެވެ.

ދެކުނު ސަރަހައްދުގެ ބައެއް މަސްވެރިން، "ހަވާސާ އޮންލައިން" އާ މަޢުލޫމާތު ހިއްސާ ކުރިގޮތުގައި މަޖިލިސް އިންތިހާބު ނިމުނު ފަހުން ސަރުކާރުން އަދިވެސް އެމީހުންނަށް ދައްކަންޖެހޭ ފައިސާ ދޫކޮށްފައެއް ނުވެ އެވެ. ނަތީޖާއެއްގެ ގޮތުން ގިނަ މަސްވެރިންނަށް ދަރިންނަށް ފޮތްތަކާއި ގަލަން ފަދަ ކޮންމެހެން ބޭނުންވާ ސްކޫލް ސާމާނު ވެސް ހޯދައިދެވޭ ވަރުވެސް ނެތްކަމުގައެވެ.

"ހަވާސާ އޮންލައިން" އާއި މަޢުލޫމާތު ހިއްސާ ކުރަމުން މަސްވެރިން ބުނެފައި ވަނީ މަސްވެރިންގެ ހައްގުތައް ކަށަވަރު ކުރުމަށާއި އަދި މަސްވެރިން އަޑު ސަރުކާރަށް އިއްވުމަށް މުޅި ރާއްޖޭގެ އެކި ހިސާބުތަކުގައި މުޒާހަރާ ކުރުމަށް އަންނަނީ ތައްޔާރު ވަމުން ކަމުގައެވެ. މުޒާހަރާގެ ތައްޔާރީތައް މިހާރު ކުރިއަށްދާއިރު، މަސްވެރިން ހަރުއަޑުން ބުނަމުންދަނީ ސަރުކާރުން މަސްވެރިންނަށް ދައްކަންޖެހޭ ފައިސާ ދޫނުކުރާހާ ހިނދަކު އެމީހުންގެ މުޒާހަރާ ކުރުމުގައި ދެމިތިބޭނެ ކަމަށެވެ.އަދި ސަރުކާރުން އެގޮތަށް އަމަލު ނުކޮށްފިނަމަ މުޅި މަސްވެރިކަމުގެ ސިނާއަތް ހުއްޓުމަކަށް ގެނައުމުގެ އިންޒާރު ވެސް މަސްވެރިން ވަނީ ދީފަ އެވެ.

މިދިޔަ ފެބްރުއަރީ މަހު މަސްވެރިން ވަނީ ޖުމްލަ 300 މިލިއަން ރުފިޔާގެ މަހުގެ ފައިސާ ނުލިބި އެތައް މަހެއް ވަންދެން ހޭދަކޮއްފަ އެވެ. މިހާރުގެ ފިޝަރީޒް މިނިސްޓަރު ޝިޔާމް ހަފްތާއެއްގެ ތެރޭގައި ފައިސާ ދެއްކޭނެ ކަމުގެ ޔަގީންކަން ދެއްވި ނަމަވެސް ސަރުކާރަށް މި ވައުދު ފުއްދައި ނުދެވުނެވެ. އޭގެ ފަހުން "ހަވާސާ އޮންލައިން" އިން ކުރި ތަހުގީގުތަކުން ކަށަވަރުވީ މަޖިލިސް އިންތިހާބު ނިމުނު ފަހުން މަސްވެރިންނަށް ލިބެންޖެހޭ ފައިސާ ލިބިފައި ނުވާކަމެވެ.

މިފްކޯއިން މަސްވެރިންނަށް އެންމެ ފަހުން ފައިސާ ދޫކޮއްފައި ވަނީ މިދިޔަ އޭޕްރީލް މަހުގެ 22 ގައެވެ. އޭޕްރިލް 22 ގައި ސަރުކާރުން މަސްވެރިންނަށް ފައިސާ ދޫކޮއްފައިވަނީ މަޖްލިސް އިންތިހާބު ކުރިއަށް އޮތުމުގެ ސަބަބުންނެވެ. މަޖްލިސް އިންތިހާބު ނިމި ސުޕަމެޖޯރިޓީ ލިބުމާއި އެކު މަސްވެރިންނަށް ވެފައިވާ ވައުދުތައް މަތިން ސަރުކާރުން ވަނީ ހަނދާން ނައްތާލާފައެވެ.