ގޯލްޑަން ފުޓްސެލް މުބާރާތް 2026 ގެ ލާމު އަތޮޅު ސެމީ ފައިނަލުގައި ވާދަވެރި ކުޅުމަކަށްފަހު ލ. މާވަށް ބަލިކޮށް، ލ. ގަން މުބާރާތުގެ ފައިނަލުން ޖާގަ ހޯދައިފިއެވެ. މި މެޗު ގަމުން ކާމިޔާބުކުރީ ފުރިހަމަ ވަގުތު ހަމަވިއިރު ދެ ޓީމު އެއްވަރުވުމުން، ނަތީޖާ ނެރުމަށްޓަކައި ޖެހި ޕެނަލްޓީގައެވެ.
މެޗު ފެށިގެން ދެ ޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔައިރު، މެޗުގެ ކުރީކޮޅު ލިބުނު ކޯނަރެއްގެ ބޭނުން ހިފައި ގަމަށް ކުރި ހޯދައިދިނީ އެޓީމުގެ އަހްމަދު ހަލީމެވެ. ނަމަވެސް، ގަމުން ލަނޑު ޖެހިތާ މާގިނަ އިރުތަކެއް ނުވަނީސް، މާވަށު ޓީމުން އުފެއްދި ނުރައްކާތެރި ހަމަލާއެއްގައި އެޓީމުގެ އަހްމަދު މުހައްމަދު ވަނީ ގޯލެއް ކާމިޔާބުކޮށް މެޗުގެ ނަތީޖާ ހަމަހަމަކޮށްދީފައެވެ.
ދެވަނަ ހާފުގައި ދެ ޓީމުންވެސް ލަނޑެއް ޖަހައި މެޗުން މޮޅުވުމަށް ގިނަ މަސައްކަތްތަކެއް ކުރި ނަމަވެސް، މެޗުގެ ވަގުތު ހަމަވިއިރު އިތުރު ގޯލެއް ފެނިފައެއް ނުވެއެވެ. މިއާއެކު މެޗުގެ ނަތީޖާ ނެރުނީ ޕެނަލްޓީ ޖަހައިގެންނެވެ.
ޕެނަލްޓީ ޝޫޓްއައުޓްގައި ގަމުގެ ކީޕަރު މުހައްމަދު ރަޝީދު ވަނީ ތަފާތު މޮޅު ކުޅުމެއް ދައްކާފައެވެ. މާވަށު ޓީމުން ފޮނުވާލި ހުރިހާ ޕެނަލްޓީތަކެއް އޭނާ ދިފާއުކުރިއިރު، ގަމު ޓީމުން ވަނީ އެޓީމުން ޖެހި ތިން ޕެނަލްޓީވެސް ކާމިޔާބުކޮށްފައެވެ.
މި މެޗުގެ މޭން އޮފް ދަ މެޗަކަށް ހޮވުނީ، ޕެނަލްޓީތައް ދިފާއުކޮށް ގަން ފައިނަލަށް ގެންގޮސްދިނުމުގައި އެންމެ މުހިންމު ދައުރެއް އަދާކުރި އެޓީމުގެ ގޯލްކީޕަރު މުހައްމަދު ރަޝީދެވެ. މި ކާމިޔާބީއާއެކު ގަން މިވަނީ މުބާރާތުގެ ލާމު އަތޮޅުގެ ފައިނަލަށް ދަތުރުކޮށްފައެވެ.
ލާމު އަތޮޅުގެ ފައިނަލްގައި ބައްދަލުކުރާނީ އެ އަތޮޅުގެ ފުޓްސެލްގެ އެންމެ ބޮޑު ދެ ބާރު ކަމަށްވާ ލ. އިސްދޫ އާއި ލ. ގަމެވެ.
ކިޔުންތެރިންގެ ހިޔާލު