ރާއްޖެ އާއި އިންޑިއާއާ ދެމެދު އޮތް ޒަމާންވީ ގުޅުން ގޯސްވީ އޭރު އިދިކޮޅުގައި އޮތް ޕީޕީއެމް/ ޕީއެންސީން ހިންގި "އިންޑިއާ އައުޓް" ކެމްޕެއިނުގެ ސަބަބުން ނޫން ކަމަށާއި އެ ގުޅުން ގޯސްވީ ސަރުކާރުގެ މަސްއޫލްވެރި މަގާމުތަކުގައި ތިއްބެވި ބައެއްގެ އަމަލުތައް ހުރި ގޮތުން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ޕީޕަލްސް ނޭޝަނަލް ފްރޮންޓްގެ ނަމުގައި ޔާމީން އިސްވެ ހުންނަވައި އުފައްދަން މަސައްކަތްކުރާ ޕާޓީން ރޭ ބޭއްވި ޖަގަހަ ޖަލްސާގައި އެ މަނިކުފާނު ވިދާޅުވީ އިންޑިއާ އައުޓްގެ ނަމުގައި މި ހުރިހާ ދުވަހެއް ވަންދެން ހިންގި ކެމްޕެއިނުގެ ސަބަބުން އިންޑިއާއާ އެއްވެސް މައްސަލައެއް ނުޖެހޭ ކަމަށެވެ.

"މިހާރު ވެގެން އުޅޭ ކަމަކީ ލަކްޝަދީޕްގައި ޓޫރިޒަމްގެ ކަންތައްތަކެއް ކުރަން އުޅޭތީ އަޅުގަނޑުމެން ވެސް ގަބޫލުނުކުރާ މިންވަރަށް އިނގޭތޯ، އިޖުތިމާއީ މިންގަނޑު ވެސް ފަހަނައަޅައިދާ މިންވަރަކަށް ސަރުކާރުގެ މަސްއޫލިއްޔަތު އަދާކުރާ މަގާމުތަކުގައި ތިއްބެވި ތިން ބޭފުޅަކު ވަރަށް ހުތުރު ބަހުން ދަށް ފެންވަރުގެ ރައްދުތަކެއް [އިންޑިއާގެ ބޮޑުވަޒީރު ނަރެންދުރަ މޯދީ އަށް] ދިން. އެއީ އިންޑިއާ ސަރުކާރަށް ބަލައިނުގަނެވުނު ކަމަކީ،" ޔާމީން ވިދާޅުވި އެވެ.

ޔާމީން އެ އިޝާރާތްކުރެއްވީ ލަކްޝަދީޕްގެ ޓޫރިޒަަމް ޕްރޮމޯޓްކުރުމަށް އިންޑިއާގެ ބޮޑުވަޒީރު ކުރެއްވި ސޯޝަލް މީޑިއާ ޕޯސްޓަށް ޔޫތު މިނިސްޓްރީގެ ތިން ޑެޕިއުޓީ މިނިސްޓަރުން ކަމަށްވާ މަލްޝާ ޝަރީފާއި މަރިޔަމް ޝިއުނާ އަދި އަބްދުﷲ މަހްޒޫމް މާޖިދު ދިން ރައްދުތަކަކަށެވެ. މޯދީއަށް މަލާމާތް ރައްދުވާ ގޮތަށް ކުރި ޕޯސްޓްތަކާ ގުޅިގެން އެ ތިން ބޭފުޅުން ވަނީ ސަސްޕެންޑްކޮށްފަ އެވެ.

ޔާމީން ވިދާޅުވި ގޮތުގައި އެ ބޭފުޅުން ވަނީ ހުތުރު އަދި ދަށް ފެންވަރުގެ ބަސްތައް އިންޑިއާގެ ބޮޑުވަޒީރު ނަރެންދުރަ މޯދީއަށް އަމާޒުކުރައްވައިފަ އެވެ. އެ ގައުމަށް ބަލައިނުގަނެވުނު ކަމަކީ އެއީ ކަމަށް ވެސް ޔާމީން ވިދާޅުވެ އެވެ.

"އެކަމަކު މިއޮއްހާ ދުވަހު މި ހިންގި އިންޑިއާ އައުޓް ކެމްޕެއިނުގައި މިއީކީ މައްސަލައެއް ކަމަކަށް ގަބޫލެއް ނުކުރޭ. އެ މީހުންގެ ރައްޔިތުން ވެސް ގަބޫލުކުރޭ އިންޑިއާ މިލިޓަރީ އޮވެގެން ނުވާނެ ކަމަށް،" ޔާމީން ވިދާޅުވި އެވެ.

ޔާމީން ވަނީ އިންޑިއާ އައުޓާ ގުޅުވައި، ޖުމްހޫރީ ޕާޓީގެ ލީޑަރު ގާސިމް އިބްރާހިމް އަމާޒުކުރެއްވި ފާޑުކިޔުންތަކަށް ވެސް ރައްދު ދެއްވައިފަ އެވެ. އިންޑިއާ އާއި ރާއްޖެއާ ދެމެދު ފިތުނައިގެ ހުޅުގަނޑު ރޯކުރީ ޔާމީނުކަމަށް ގާސިމް ވިދާޅުވުމުން ޔާމީން ވަނީ އެއީ އެކަމާ ފަހުރުވެރިވާ ކަމަށް ވިދާޅުވެފަ އެވެ. އެކަމަކު އެއީ ފިތުނަ ކަމަށް ގަބޫލުނުކުރައްވާ ކަމަށް ޔާމީން ވިދާޅުވި އެވެ.

"އެއީ ފިތުނަކަމަކަށް ގަބޫލެއް ނުކުރެވޭ. އަޅުގަނޑު ތެދުވީ ވަތަނީ ކޯލެއްގައި. މިއަދު މަސް ދޯނި ފަހަރު ގެންގުޅޭ މީހުން ގަބޫލުކުރާނެ އަޅުގަނޑު ތެދުވީ ވަތަނީ ކޯލެއްގައިކަން."

ޔާމީން ވިދާޅުވީ މި ސަރުކާރަކީ އިންޑިއާގެ މިލިޓަރީ ރާއްޖޭގައި އޮވެގެން ނުވާނެ ކަމަށް ބުނެ އައި ސަރުކާރަކަށް ވިޔަސް ވެރިކަމަށް އައުމަށް ފަހު ފެންނަނީ މުޅިން އެހެން މަންޒަރެއް ކަމަށެވެ.

ޔާމީން ފާޑުވިދާޅުވީ ރާއްޖެއަށް އިންޑިއާއިން ހަދިޔާ ކުރި އަސްކަރީ އުޅަނދުތައް އޮޕަރޭޓްކުރަން ތިބި އެ ގައުމުގެ ސިފައިންގެ ބަދަލުގައި މަދަނީ މީހުން ގެންނަން ދެ ގައުމުން އެއްބަސްވި ކަމަށް ބުނާ މައްސަލައިގަ އެވެ.

"ސަރުކާރު އައި މިވާހަކަ ދައްކަމުން. މިހާރު އެބަ ބުނޭ ހެލިކޮޕްޓަރު ދުއްވުމާއި އެހެން ކަންކަމުގައި އިންޑިއާ ސިފައިން ޔުނިފޯމުގައި ނުތިބޭށޭ. އާންމުން ގޮތަށް ތިބުމުގައި މައްސަލައެއް ނެތޭ،" ޔާމީން ވިދާޅުވި އެވެ.

ޔާމީން ވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި "އިންޑިއާ އައުޓް" ކިޔުން މަނާކުރާ ގަރާރެއް އެ ސަރުކާރުން ނެރުނުއިރު މި ސަރުކާރުން އެ ބާތިލުނުކުރާތީ ވެސް ކަންބޮޑުވުން ފާޅުކުރައްވައިފަ އެވެ.

ޔާމީން ވިދާޅުވީ ދިވެހި ރައްޔިތުން ވެސް އިންޑިއާ ސިފައިން ބޭރުކުރަން ބޭހުންވާކަން ސާފުވީ އޭރު އިދިކޮޅުން ހިންގި އިންޑިއާ އައުޓް ހަރަކާތްތައް ރަށްރަށަށް ފުޅާކުރިއިރު އެ ހަރަކާތްތަކުގައި ގިނަ ބަޔަކު ބައިވެރިވެފައި ވާތީ ކަމަށެވެ.