ގެދޮރުވެރިޔާ ސްކީމުން ދޫކުރާ ފްލެޓްތަކަށް ޝަރުތު ހަމަކުރަން މާލޭގައި 15 އަހަރު އުޅުނު ކަމަށް ދޮގު ލިއުން ހުށަހަޅާފައިވާ ކަމަށާއި އެ ލިއުންތައް ދޫކޮށްފައިވާ ކައުންސިލްތަކުގެ މައްސަލަ ވެސް ބަލާނެ ކަމަށް އެންޓި ކޮރަޕްޝަން ކޮމިޝަން (އޭސީސީ)ން މިއަދު ބުނެފި އެވެ.

މާލޭގައި އުޅޭތާ 15 އަހަރުވީ ދިވެހިންނަށް ކުރިމަތިލެވޭ ގޮތަށް ހުޅުވާލި ފްލެޓް ސްކީމް އޮތީ، ވަޒީފާ އަދާކުރި އޮފީސްތަކާއި ކުއްޔަށް ދިރިއުޅުނު ގެތަކުގެ ވެރިފަރާތުގެ ލިއުމަކާއި ރަށުގައި ދިރިނޫޅޭތާ 15 އަހަރުވެފައިވާ ކަމަށް ކައުންސިލުން ދޫކުރާ ލިއުމެއް ނުވަތަ މާލޭގައި ކިޔެވި ސްކޫލްތަކުން ލީވިން ސެޓްފިކެޓް ހުށަހެޅިޔަސް ޝަރުތު ހަމަވާ ގޮތަށެވެ.

ފްލެޓަށް ޝަރުތު ހަމަވާ ގޮތަށް ލިއުންތައް، ބައެއް ކައުންސިލްތަކުން ވެސް ހޯދާފައިވެ އެވެ. އެ ލިއުން ދޫކުރާ ކަން އާއްމުކޮށް ބައެއް ކައުންސިލްތަކުން އިއުލާން ވެސް ކުރި އެވެ.

ފްލެޓް ލިސްޓް އާއްމުކުރުމާ އެކު އާއްމުން ހުށަހެޅި ޝަކުވާތަކާ ގުޅިގެން އޭސީސީން ކުރި ތަހުގީގުން އެނގުނީ، މާލޭގައި ދިރިއުޅޭތާ 15 އަހަރު ނުވާ މީހުން ވެސް ފްލެޓް ލިބޭ ލިސްޓުގައި ހިމަނާފައިވާ ކަމެވެ. މީގެތެރެއިން ބައެއް މީހުން ވަނީ، މާލޭގައި އެ މުއްދަތަށް ނޫޅުނު ނަމަވެސް ކައުންސިލުތަކުންނާއި ކުންފުނިތަކުން ވެސް ލިޔުންތައް ހޯދައިފަ އެވެ.

އޭސީސީގެ ތަހުގީގުގެ މާކުރިން ވެސް ބައެއް މީހުން ދޮގު ލިއުން ހުށަހެޅިކަން އޮތީ ފަޅާއަރައިފަ އެވެ. ލިސްޓު އާއްމުކުރުމާ އެކު ފްލެޓް ލިބުނު ބައެއް މީހުންނަކީ ރަށުގައި ދިރިއުޅޭ މީހުން ކަމުގެ ޝަކުވާތައް ކަމާބެހޭ އިދާރާތަކަށް ހުށަހެޅި އެވެ.

ސައްހަ ނޫން ލިއުން ދިން ކައުންސިލްތަކާއި ކުންފުނިތަކުގެ މައްސަލަ ބަލާނެ ކަމަށް އޭސީސީން ބުނީ، ފްލެޓްތަކުގެ ތަހުގީގާ ގުޅިގެން އާއްމުންގެ މީހަކު ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހުށަހެޅި ޝަކުވާތަކާ ގުޅިގެން އެ ކޮމިޝަންގެ މެމްބަރުން ހާޒިރުކުރި ބައްދަލުވުމުގަ އެވެ.

ކައުންސިލުތަކުން ސައްހަ ނޫން ލިޔުން ދޫކުރި ނަމަ ދެން އެކަމުގައި އަމަލުކުރާނީ ކިހިނެއްތޯ ދާންދޫ ދާއިރާ މެމްބަރު ޔައުގޫބް އަބްދުﷲ ސުވާލުކުރެއްވުމުން އޭސީސީގެ ނައިބް ރައީސް އަބްދުއްސަލާމު ވިދާޅުވީ މުއްސަސާތަކުން ދޮގު މައުލޫމާތު ދިނުމަކީ ކުށެއް ކަމަށެވެ. ފްލެޓް ލިބުނު ކަމަށް ލިސްޓުގައި ހިމެނޭ ބައެއް މީހުން ދޮގު ލިޔުންތައް ހުށަހަޅާފައިވާކަން ތަހުގީގަށް ފާހަގަކުރެވޭ ކަމަށް އޭނާ ވިދާޅުވި އެވެ.

ސަލާމް ވިދާޅުވި ގޮތުގައި މީހަކަށް ނާޖާއިޒު ފައިދާއެއް ހޯދައިދޭން ނުވަތަ ރިޝްވަތެއް ހޯދައިދޭން ކައުންސިލުތަކުން ލިޔުން ހަދައިދީފައިވާ ނަމަ އެ މައްސަލަ ބަލާނެ އެވެ.

"ފައިދާއެއް ހޯދައިދޭން ނޫނީ ރިޝްވަތެއް ހޯދައިދޭން ވަކި ގޮތަކަށް ދޮގު މައުލޫމާތުތައް ދީފައިވާ ނަމަ، އަޅުގަނޑުމެންގެ މެންޑޭޓުގައި ހިމެނޭ ކަމެއް ނަމަ އެކަން ވަކި މައްސަލައެއްގެ ގޮތުގައި ބަލާނަން،" އޭނާ ވިދާޅުވި އެވެ.

އެ މައްސަލަ އޭސީސީއަށް ބެލެން ނެތް ނަމަ އެކަން ޕޮލިހަށް ހުށަހަޅާނެ ކަމަށް ވެސް ސަލާމް ވިދާޅުވި އެވެ.

އޭނާ ވިދާޅުވީ ކައުންސިލުތަކުގެ އިތުރުން ކުންފުނިތަކުން ވެސް ދޮގު ހަދައިގެން ދޫކުރި ލިޔުންތައް ބަލަމުން އަންނަ ކަމަށާއި އެކަމުގެ މައުލޫމާތު އެއްކުރުމަށް ފަހު، މެންޑޭޓުގައި ހިމެނޭ ނަމަ އޭސީސީން އެ މައްސަލަ ވަކި މައްސަލައެއްގެ ގޮތުގައި ބަލާނެ ކަމަށެވެ.

ފްލެޓް ލިބުނު މީހުންގެ 60 ޕަސެންޓް މީހުންނަކީ އޮޅުވާލައިގެން ފްލެޓް ހޯދި މީހުން ކަމަށް ތަހުގީގަށް ފަހު އޭސީސީން ވަނީ ބުނެފަ އެވެ. އެ މައްސަލާގައި ސަރުކާރުން އަމަލުކުރާނެ ވަކި ގޮތެއް އަދި ނުނިންމަ އެވެ.

އެކަމަކު ގިނަ ބަޔަކު ދަނީ އޮޅުވާލައިގެން ފްލެޓް ހޯދި މީހުންގެ ލިސްޓު އާންމުކުރުމަށް ގޮވާލަމުންނެވެ. އެކަމަކު އޭސީސީން އެ މައްސަލާގައި ބުނީ މިހާތަނަށް އެ ލިސްޓު އާންމުކުރުމާ މެދު ވަކި ގޮތެއް ނުނިންމާ ކަމަށެވެ.