މިހާރު މާލޭގައި ކުރިއަށްދާ ކާވާ ވިމެންސް ކަޕް 2025ގައި ރާއްޖެ އާއި އަފްޣާނިސްތާން ވާދަކުރި މެޗު ރާއްޖެއިން ކާމިޔާބުކޮށްފިއެވެ.
ސޯސަލް ސެންޓަރުގައި ކުރިއަށްދާ މި މުބާރާތުގައި އަފްޣާނިސްތާންގެ މައްޗަށް ރާއްޖެ ކުރި ހޯދާފައިވަނީ ސީދާ ތިން ސެޓުންނެވެ.
ރާއްޖޭގެ ސީނިއާ އަންހެން ވޮލީ ޓީމުގެ ފަރާތުން މޮޅު ކުޅުމެއް ފެނިގެން ދިޔަ މި މެޗުގެ ފުރަތަމަ ސެޓުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެން ގޮސްފައިވާއިރު، އެހެން ނަމަވެސް ރާއްޖޭން ނެގި ލީޑާއެކު އަފްޣާނިސްތާނުގެ މައްޗަށް ރާއްޖޭން ވަނީ ކުރި ހޯދާފައެވެ.
މެޗުގެ ފުރަތަމަ ސެޓުގައި އަފްޣާނިސްތާނުގެ މައްޗަށް ރާއްޖޭން ކުރި ހޯދާފައިވަނީ 25-20ގެ ނަތީޖާ އަކުންނެވެ. ފުރަތަމަ ސެޓާއި ހިލާފަށް މެޗުގެ ދެވަނަ ސެޓުގައި ރާއްޖޭގެ ފަރާތުން ވަނީ މޮޅު ކުޅުމެއް ދައްކާ އަފްޣާނިސްތާނުގެ މައްޗަށް ބޮޑު ލީޑަކާއެކު ސެޓު ކާމިޔާބުކޮށްފައެވެ.
މެޗުގެ ދެވަނަ ސެޓު ރާއްޖޭން ކާމިޔާބުކޮށްފައިވަނީ 25-13ގެ ނަތީޖާ އަކުންނެވެ.
މެޗުގެ ތިން ވަނަ ސެޓު ފަށައިގެން ރާއްޖޭން ވަނީ އަފްޣާނިސްތާނުގެ މައްޗަށް ބޮޑު ލީޑެއް ނަގާފައެވެ. މިގޮތުން ރާއްޖެން 15 ޕޮއިންޓް ހޯދިއިރު އަފްޣާނިސްތާނަށް ހޯދިފައިވަނީ ހަ ޕޮއިންޓެވެ. ތިން ވަނަ ސެޓު ފަށައިގެން ރާއްޖޭން ނެގި ބޮޑު ލީޑާއެކު މި ސެޓު 25-12 ކާމިޔާބުކޮށް ރާއްޖެ ވަނީ މެޗު ކާމިޔާބުކޮށްފައެވެ.
މި މުބާރާތުގައި ރާއްޖެއިން ކުޅޭ ތިން ވަނަ މެޗުގައި ނިކުންނާނީ ކިރްގިސްތާނާއި ދެކޮޅަށެވެ.
ކިޔުންތެރިންގެ ހިޔާލު