އަސްލަމާއި ސަލީމް ނޫން މެމްބަރަކަށް ރިޔާސަތު ހަވާލުކުރަން ޖެހޭކަމަށް މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގް (ޓޮމް) މިއަދު ގޮވާލައްވައިފިއެވެ.

މި އަހަރަށް ރައްޔިތުންގެ މަޖިލިސް ހުޅުވަން މާދަމާ ޖަލްސާ ބާއްވާ އިރު، އެ ދުވަހަކީ ރައީސުލްޖުމްހޫރިއްޔާ ރިޔާސީ ބަޔާން އިއްވަވާ ދުވަހެވެ. މިއީ ރައީސް ޑރ. މުހައްމަދު މުއިއްޒު ރާއްޖޭގެ ވެރިކަމާ ހަވާލުވެވަޑައިގެންނެވި ފަހުން، އެމަނިކުފާނު އިއްވަވާ ފުރަތަމަ ރިޔާސީ ބަޔާނެވެ. ރިޔާސީ ބަޔާން އިއްވަވަން ބާއްވާ ޖަލްސާ އެޖެންޑާކޮށްފައިވާ އިރު، މަޖިލިހުގެ ރައީސް އަސްލަމާއި ނައިބު ރައީސްގެ އިތުބާރު ނެތް ކަމުގެ މައްސަލަ މަޖިލިހަށް ހުށަހަޅައި އެކަމުގެ ނޯޓިސް އެބޭފުޅުންނަށް ވަނީ ފޮނުވައިފައެވެ.

ތޯރިގް "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައްޔިތުންގެ މަޖިލިހުގެ ކުރީގެ ރައީސް މުހައްމަދު ނަޝީދުގެ މައްޗަށް އިތުބާރު ނެތް ކަމުގެ މައްސަލައެއް މަޖިލިހަށް ވެއްދުމާ އެކުގައި، ނަޝީދު ވެސް ރިޔާސަތުން ދުރަށް ޖެހިވަޑައިގެންނެވި ކަމަށެވެ. މާދަމާގެ މަޖިލިހުގެ ރިޔާސަތު ރައީސް އަސްލަމާއި ނައިބު ރައީސް ސަލީމްގެ ބަދަލުގައި ރިޔާސަތު ބަލަހައްޓަވާ ފަސް މެމްބަރުންނާ ހަވާލުކޮށް ދެއްވުމަށް ވެސް ތޯރިގް ގޮވާލެއްވިއެވެ.

ރައީސް ނަޝީދުގެ އިތުބާރުނެތްކަމަށް ހުށަހެޅުމާއެކު ރިޔާސަތުން ދުރަށްޖެހިވަޑައިގަތް. މާދަމާގެ މަޖިލީހުގެ ރިޔާސަތު ރައީސް އަސްލަމާއި ނައިބު ސަލީމްގެ ބަދަލުގައި ރިޔާސަތުބަލަހައްޓަވާ 5 މެންބަރުންނާއި ހަވާލުކޮށްދެެއްވާ.ޑިމޮކްރަސީއަކީ އެމީހަކާ ޖެހުނީމަ އެއްލާލާ އެއްޗަކަށް ނުހައްދަވާ. pic.twitter.com/mBjP5EXk8m

— Ahmed Thariq (@AhmedThaariq) February 4, 2024

"ޑިމޮކްރަސީއަކީ އެމީހަކާ ޖެހުނީމަ އެއްލާލައި އެއްޗަކަށް ނުހައްދަވާ،" ތޯރިގް ވިދާޅުވިއެވެ.

މަޖިލީހުގެ ގަވައިދުގައިވާ ގޮތުން އިތުބާރު ނެތް ކަމުގެ މައްސަލަ ހުށަހެޅުމުން 14 ދުވަސް ތެރޭގައި ނޯޓިސް ފޮނުވަން ޖެހެއެވެ. ގަވައިދާ އެއްގޮތަށް އަސްލަމާއި ސަލީމަށް ނޯޓިސް ފޮނުވާފައިވަނީ މިއަދުގެ ވަގުތެއްގައި ކަމަށް މަޖިލިހުގެ އިދާރާ އިން ހާމަކުރެއެވެ. އަސްލަމާއި ސަލީމްގެ އިތުބާރު ނެތް ކަމުގެ ގަރާރު މަޖިލިހަށް ހުށަހެޅީ 23 މެމްބަރުންގެ ސޮޔާއެކުގައެވެ. އޭގައި ގިނައިން ސޮއިކުރެއްވީ ވެރިކަން ކުރާ ޕީޕީއެމް/ޕީއެންސީގެ މެމްބަރުންނެވެ.

މަޖިލީހުގެ ރައީސް އާއި ނައިބު ރައީސް މަގާމުން ވަކި ކުރެވޭނީ ޖަލްސާއަށް ހާޒިރުވި މެންބަރުންގެ އަޣުލަބިއްޔަތުންނެވެ. އެމްޑީޕީގައި މިވަގުތު 44 މެމްބަރުން ތިއްބެވިއިރު، އެ ޕާޓީއާ އެކީގައި މަސައްކަތް ކުރާ ޑިމޮކްރެޓްސްގައި 13 މެމްބަރުން އެބަތިއްބެވިއެވެ. އަދި ސަރުކާރާ އެކުގައި މަސައްކަތް ކުރައްވާ 30 ވަރަކަށް މެމްބަރުން އެބަތިއްބެވިއެވެ.

އަސްލަމާއި ސަލީމްގެ އިތުބާރު ނެތް ކަމުގެ މައްސަލަ ސަރުކާރު ހިންގާ ޕީޕީއެމް/ޕީއެންސީ އިން ހުށަހެޅީ ބައެއް މިނިސްޓަރުންނަށް ރުހުން ނުދޭން އިދިކޮޅު އެމްޑީޕީ އާއި ޑިމޮކްރެޓްސް އިން ނިންމުމާ އެކު، މަޖިލީހުގައި ހަމަނުޖެހުން ހިންގާފައިވަނިކޮށެވެ.

މަޖިލީހުގެ ގަވާއިދު ބުނާ ގޮތުން މަޖިލީހުގެ ރައީސް އަދި ނައިބު ރައީސަށް ޖަލްސާގެ ރިޔާސަތު ނުބެލެހެއްޓެވޭ ވަގުތުތަކުގައި ޖަލްސާގެ ރިޔާސަތު ބަލަހައްޓަވާނެ ފަސް މެމްބަރަކު މަޖިލީހުން ކަނޑައަޅަން ޖެހެއެވެ. އެ ފަސް މެމްބަރުންނަކީ މަޖިލިހުގައި އެންމެ ދުވަސްވީ މެމްބަރުންނަށް ވާން ޖެހޭނެއެވެ.

އެގޮތުން، ރިޔާސަތު ބަލަހައްޓާނެ މެމްބަރުންގެ ތަރުތީބަކީ:

1- މީދޫ ދާއިރާގެ މެންބަރު އަހުމަދު ސިޔާމް މުހައްމަދު

2- މާމިގިލީ ދާއިރާގެ މެންބަރު ގާސިމް އިބްރާހިމް

3- އޭދަފުށީ ދާއިރާގެ މެންބަރު އަހުމަދު ސަލީމް

4- ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ

5- ކުޑަހުވަދޫ ދާއިރާގެ މެންބަރު އަހުމަދު އާމިރު