ޑިންގީއެއްގައި ގދ. ގައްދޫއިން ގދ. ގަމަށް ދަތުރުކުރި މީހަކު ގެއްލިގެން ހޯދަން ފަށައިފިއެވެ.
ފުލުހުން ދެންމެ ބުނީ، މިއަދު ހެނދުނު 9:30 ހާއިރު ގައްދޫއިން ފުރައިގެން ގަމަށް ޑިންގީއެއްގައި ދަތުރުކުރި 75 އަހަރުގެ ދިވެހި ފިރިހެނެއްގެ ހަބަރެއް ނުވެގެން މިއަދު ހަވީރު 5:05 ހާއިރު ފުލުހުންނަށް ރިޕޯޓު ކޮށްފައިވާކަމަށެވެ.
ފުލުހުން ބުނީ، މިހާތަނަށް ބެލި ބެލުމުން، މިއަދު ހެނދުނު 11:15 އެހާއިރު ގަމުން ފުރާފައިވާކަމަށް މައުލޫމާތު ލިބިފައިވާ ކަމަށެވެ.
އެމީހާ އެންމެފަހުން ފެނުންއިރު ލައިގެންހުރީ ނޫކުލައިގެ އަތްކުރު ގަމީހަކާއި ކަޅުކުލައިގެ ސޯޓެއްކަމަށް ވެސް ފުލުހުން ބުންޏެވެ.
އެ މީހާ ހޯދުމަށް ކުރަމުންދާ މަސައްކަތުގެ ތެރެއިން، އެމްްއެންޑީއެފް ސައުތު ރީޖަން ކޯސްޓްގާޑުން ބޭރުކަނޑުގެ ސަރަހައްދު ބެލުމުގެ މަސައްކަތް ކުރަމުން ދާކަމަށާއި އަދި ގަމާ ކައިރި ފަޅުރަށްތައް ބެލުމުގެ މަސައްކަތް ފުލުހުންގެ ޓީމުތަކުން ކުރަމުން ދާކަމަށް ފުލުހުން މައުލޫމާތު ދެއެވެ.
މި ހާދިސާއާ ގުޅޭ އިތުރު މައުލޫމާތެއް އަދި ފުލުހުން ހާމަކޮށްފައެއްނުވެއެވެ.
ކިޔުންތެރިންގެ ހިޔާލު