ރާއްޖޭގެ އިގްތިސޯދީ ސަރަހައްދުގައި މަސްވެރިކަން ކުރަނިކޮށް "އަސުރުމާ 3" ދޯންޏަށް އަރައި އިންޑިއާ ސިފައިން ވަނީ މަސްވެރިންގެ ފޯނުތައް އަތުލައި ހެކިތައް ނައްތާލާފައިވާ ކަމަށް "ހަވާސާ" ނޫހައް އެނގިއްޖެއެވެ.

ރާއްޖޭގެ ކަނޑުގެ ސަރަހައްދުގައި އޮއްވައި އިންޑިއާގެ ކޯސްޓުގާޑުން އެ ދޯންޏަށް އަރައި މަސްވެރިންނާ ސުވާލުކުރީ އިއްޔެ މެންދުރު ފަހެވެ. ރާއްޖޭގެ ފިޝަރީޒް މިނިސްޓްރީގެ ވެސަލް މޮނީޓަރިން ސިސްޓަމް އިން ކަށަވަރު ވަނީ ދޯނި އޮތީ ރާއްޖޭގެ އިގްތިސޯދީ ސަރަހައްދުގައި ކަމަށެވެ.

އެކަމުގެ މައުލޫމާތު އެނގޭ މީހަކު "ހަވާސާ" ނޫހައް މިއަދު ކިޔައިދިން ގޮތުގައި އިންޑިއާ ސިފައިން މަސް ދޯންޏަށް އަރައި، މަސްވެރިންނާ ވަނީ ސުވާލުކޮށްފަ އެވެ. ދޯންޏަށް އަރައި އިންޑިއާ ސިފައިން ދިވެހި މަސްވެރިންނާ ސުވާލުކުރަނިކޮށް، މަސްވެރިން ފޮޓޯތައް ނެގުމުން، އިންޑިއާ ސިފައިން ވަނީ އެ މީހުންނަށް މަޖުބޫރުކޮށް، ހުރިހާ ހެއްކެއް ފޮހެލާފައި ކަމަށް އެ މީހާ ބުންޏެވެ.

ބޮޑުކަންނެލި މަސްވެރިންގެ ޔޫނިއަނުން އިއްޔެ "ހަވާސާ" ނޫހައް މަޢުލޫމާތު ދިން ގޮތުގައި ރާއްޖޭގެ އުތުރު ކަނޑުގައި އޮތް ތިން މަސްދޯންޏަކަށް ބޭރުގެ ސިފައިން އެރި ކަމަށާއި އެ މީހުން އުޅުނީ ދޯނީގެ ސެޓެލައިޓް ފޯނުގެ ނަންބަރު ހޯދަން ކަމަށެވެ. އެއީ "އަސުރުމާ 3" އާއި "ނެރު 7" އަދި "މާހޯރަ 3" އެވެ.

އޭނާ ކިޔައިދިން ގޮތުގައި އިންޑިއާގެ ކޯސްޓްގާޑުން ފުރަތަމަ ދޯނި ކައިރިއަށް ފޮނުވީ ޑްރޯނެކެވެ. އޭރު އިންޑިއާ ކޯސްޓްގާޑުގެ ދެ ބޯޓު އެ ސަރަހައްދުގައި އޮތް ކަމަށް ވެސް އޭނާ ބުންޏެވެ.

އިންޑިއާގެ ސިފައިންގެ ހަ މީހަކު ދޯންޏަށް އަރައި ބިރު ދެއްކިއިރު، އެ މައްސަލަ ބަލަމުން އަންނަ ކަމަށް އެމްއެންޑީއެފުން ވަނޯ ބުނެފައެވެ. އެ ހާދިސާ ހިނގުމާ އެކު އެ ސަރަހައްދަށް އެމްއެންޑީއެފްގެ ކޯސްޓްގާޑެއް ފުރުވައިލި އެވެ. އެކަމަކު، ރާއްޖޭގެ ކޯސްް ގާޑަށް އެ ހިސާބަށް ފޯރީ ރޭ ވަރަށް ލަސްވި ފަހުންނެވެ.