ވާރޭ ވެހުމަކީ މަދިރި އާލާވެ، ގިނަވާ ކަމެކެވެ. މިކަން އެންމެނަށްވެސް އެނގެއެވެ. އެހެންނަމަވެސް، މިގޮތަށް ބޯކޮށް ވާރޭވެހޭ ދުވަސްވަރަކާ ދިމާވުމުން، ވަރަށް މަދު ފަހަރެއްގައި ނޫނީ މަދިރިން ރައްކާތެރިވުމަށް ސަމާލުކަމެއް ނުދެވެއެވެ. މަދިރިއަކީ އެކަކު ގައިން އަނެކަކު ގަޔަށް ބަލިތައް އުފުލުމުގައި ކުޅަދާނަ ސޫތްޕެކެވެ. އެސޮރަށް ލިބިފައިވާ ގާބިލުކަމުން ނުރައްކާތެރި ބަލިތައް ފެތުރުމުގައި އަވަސްރޯލެއް އަދާ ކުރެއެވެ.

މަދިރީގެ ތެރޭގައި ހިމެނޭ އީޑީސް އަކީ ޑެންގޫ ހުން ފަތުރާ ވައްތަރެވެ. މި ދުވަސްވަރަކީ ރާއްޖޭގައި ޑެންގީ ހުން އާންމު ވަމުންދާ ދުވަސްވަރެއްކަން ވަނީ ފާހަގަވެފައެވެ. މިދިޔަ ދުވަސްތަކުގައި ބައެއް މީހުން ވަނީ ޑެންގީ ހުން ޖެހިގެން މަރުވެސް ވެފައެވެ.

ވަރަށް ކުޑަކުޑަ މަސައްކަތަކާއި ހިތްވަރަކުން މަދިރި މަދުކުރެވުނު ކަމުގައި ވިޔަސް، އެކަމަށް އޮންނަނީ ފަރުވާކުޑަކުރެވިފައެވެ. މިގޮތަށް ވާރޭ ވެހޭ ދުވަސްވަރު ފެން ހަރުލާފަދަ ތަންތަން ހުރިތޯ ބަލައި އެފަދަ ތަންތަން ނައްތާލުމަށް ހާއްސަ ސަމާލުކަމެއް ދޭން ޖެހެ އެވެ.

ގެއާއި ގޯތިތެރެ އަދި ވާރޭ ވެހޭ ސަރަހައްދުގައި ފެން ހަރުލާ ގޮތަށް ހުންނަ ފުޅި، ދަޅު، ކާތަކެއްޗާއި ޕެކެޓްފަދަ އެއްޗެހި ނައްތައިލުމަކީ މުހިންމު ކަމެކެވެ. ފެންވަޅުތަކާއި ތާނގީފަދަ ތަންތަން ސާފުކޮށް ކްލޮރިން އަޅައި މަތި ބަންދުކުރަން ޖެހޭނެއެވެ. ހަދަމުން އަންނަ އިމާރާތްތަކުގައި ކޮނެފައި ހުންނަ ވަޅުގަނޑު، ޝީޓު، ލިފްޓުގޮޅި، ފެންވަޅު، ދިޔަދޮވި، ފެން އެޅޭ ގޮތަށް ހުންނަ އެހެނިހެން ތަންތަނާއި ތަކެތި، ފެން ހަރުލާ ބައެއް ވައްތަރުގެ ގަސްތައް އިންދާފައި ހުންނަ ޕޮޓްތައް، ފަދަ ތަންތަން ބަލައި ސާފުކޮށް، ފެން ހަރުލިޔަނުދީ ބަލަހައްޓާން ހާއްސަ ސަމާލުކަމެއް ދޭން ޖެހެއެވެ. ޖަމާވެ ފުނި ޖެހިފައި ހުންނަ ކުނިތަކުގެ ތެރޭގައި ފެންހަރުލިޔަ ނުދިނުމަށް، އެފަދަތަންތަންވެސް ސާފުކޮށް ބަލަހައްޓަން ޖެހޭނެއެވެ.

މަދިރިއަށް ކަމުދަނީ އަނދިރި، ހޫނު ތަންތަނުގައި ފޮރުވުމެވެ. މި ކުޑަކުޑަ ސޫފި، އަލަމާރިތަކުގައި، ސިންކުތަކުގެ ދަށުގައި ނުވަތަ ފަރުނީޗަރުގެ ދަށުގައި ފޮރުވިފައި ތިބެފައި، އިރު އޮއްސުމުން އެތަންތަނުން ނުކުމެ ފެތުރިގަނެ، ކާނާކަމަށްވާ ލޭފޮދުފޮދާއި، ނުހިކި ހުންނަ އަންނައުނު، ދާވެފައި ހުންނަ ތަކެތިން ދިޔަދަމައިގެން ބުއިމަށް، މަސައްކަތް ފަށައެވެ. އަހަރެމެން އިންސާނުންގެ ގައިންވެސް ލޭބޯން ފަށައެވެ.

މަދިރިން ރައްކާތެރިވުމަށްޓަކައި ލާ އަންނައުނުގެ އިތުރުން ނިދުމުގެ ކުރިން، އަދި އާއްމުކޮށް ދުވާލުގެ ވަގުތުތަކުގައިވެސް މިދަންނަވާ ކަންތައްތަކުން ގޭތެރެ އަމާން ކުރެވިދާނެއެވެ.

1- އުއްބައްތި، ދުންދަނޑި، އަދި އެސެންޝިއަލްއޮއިލް ބޭނުންކުރުން

2- ލުނބޯ ދެފަޅިކޮށްފައި، ލުނބޯފަޅިތެރޭގައި ކަރަންފޫ ޖަހާފައި ބެހެއްޓުން

3- ލޮނުމެދު ސްޕްރޭ

4- ޔޫކަލިޕްޓަސް ތެޔޮ

5- މަދިރި ދާގަނޑު

6- ލެވެންޑާ

7- ފޮނިތޮށި

8- ޓީޓްރީ އޮއިލް

9- މަދިރި ސްޕްރޭ

މިތަކެތި ބޭނުންކޮށްގެން ނިދާ ކޮޓަރިއާއި ދިރިއުޅޭ ގޭތެރެ، މަދިރިން ރައްކާތެރިކުރެވިފައިވާ، އަމާންތަނަކަށް ހެދިދާނެއެވެ.