ފޭސްބުކް މެސެންޖަރ މެދުވެރިކޮށް މީހެއްގެ އޮރިޔާން ވީޑީއޯ ހުރިކަމަށް ބުނެ، އެމީހާގާތަށް ގޮސް ވަޅިން ބިރުދައްކައި ފައިސާ ފޭރުމާއި، އޮރިޔާން ވީޑިއޯ ހެދުމުގެ ތުހުމަތުގައި ދެމީހަކު ހައްޔަރުކޮށްފިއެވެ.
ދިވެހި ފުލުހުންގެ ޚިދުމަތުން ވިދާޅުވީ މި މައްސަލައިގައި ހައްޔަރުކޮށްފައިވަނީ ހއ. ފިއްލަދޫ / ސީރީންމަންޒިލް، މުޙައްމަދު ޟަމީރު (29އ) އާއި ލ. ގަން / ތުނޑި. އަރާއިރު، ޢަލީ ހައިސަލް (37އ) ކަމަށެވެ.
މި މައްސަލަ ފުލުހުންނަށް ރިޕޯޓުކޮށްފައިވަނީ މިދިޔަ އޮގަސްޓު މަހުގެ 31 ވަނަ ދުވަހުކަމަށް ފުލުހުން ވިދާޅުވިއެވެ. އަދި ތުހުމަތުކުރެވޭ މި ދެމީހުން ހައްޔަރުކޮށްފައިވަނީ މި ސެޕްޓެންބަރު މަހުގެ 4 ވަނަ ދުވަހުގެ ރޭ ހުޅުމާލެ ފޭސް 1 ގައި ހިންގި އޮޕަރޭޝަނެއްގައި އެމީހުން ދިރިއުޅޭ އެޕާޓްމަންޓަކުން ކަމަށާއި، އަދި އެޕާޓްމަންޓު ބަލައިފާސްކުރިއިރު، އެކި މީހުންގެ އަތުން ފޭރިފައިވާކަމަށް ބެލެވޭ ތަކެއްޗާއި، 6 ވަޅި ފެނިފައިވާކަމަށް ފުލުހުން ވިދާޅުވިއެވެ.
ފުލުހުން އިތުރަށް ވިދާޅުވީ މި ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޢަލީ ހައިސަލް 4 ދުވަހަށް އަދި މުޙައްމަދު ޟަމީރު 15 ދުވަހަށް ބަންދުކުރުމަށް ކޯޓުން އަމުރުކޮށްފައިވާ ކަމަށެވެ.
މި މައްސަލަތައް ފުލުހުން އިތުރަށް ތަޙްގީގުކުރަމުން ދާއިރު، މި މައްސަލައާ ގުޅިގެން މި ދެމީހުންނާ ދެކޮޅަށް އިތުރު ދެ މައްސަލައެއް ރިޕޯޓުކޮށްފައިވާކަމަށާއި، މިފަދަ ކަމެއް ދިމާވެފައިވާ ފަރާތްތަކުން އެކަން ރިޕޯޓުކުރުމަށް ފުލުހުން ޚިދުމަތުން ވަނީ އިލްތިމާސްކުރައްވާފައެވެ.
ކިޔުންތެރިންގެ ހިޔާލު