މިިދިޔަ މަހު ވެލާނާ އިންޓަނޭޝަނަލް އެއާޕޯޓުން ކާގޯ ބޭރުކުރީ ރެކޯޑް އަދަދަކަށް ކަމަށް އެ އެއާޕޯޓުން ވިދާޅުވެއްޖެއެވެ.
ވެލާނާ އެއާޕޯޓުން ކޮށްފައިވާ ޕޯސްޓެއްގައި ވިދާޅުވީ ނިމިދިޔަ އޮގަސްޓް މަހުގެ ޓްރާންސްޝިޕްމެންޓްގެ ގޮތުން 1934 ޓަނުގެ ކާގޯ ބޭރުކޮށްފައިވާ ކަމަށެވެ. މިއީ މި އަހަރުގެ މިހާތަނަށް މަހެއްގެ ތެރޭގައި އެންމެ ގިނައިން ކާގޯ ބޭރުކުރެވުނު އަދަދު ކަމަށް ވީއައިއޭއިން ވިދާޅުވެފައިވެއެވެ.
މިއަހަރުގެ ފުރަތަމަ ހަ މަހަށް ބަލާއިރު ތަފާސްހިސާބުތަކުން ދައްކާ ގޮތުގައި ވީއައިއޭއިން ޓްރާންސްޝިޕްމެންޓްގެ ގޮތުގައި 6،879 ޓަނުގެ ކާގޯ އުފުލާފައިވެއެވެ. އެއާ ޓު އެއާގެ ގޮތުގައި 5،621 ޓަނުގެ ކާގޯ އުފުލާފައިވާއިރު ސީ ޓު އެއާގެ ގޮތުގައި 1،258 ޓަނުގެ ކާގޯ އުފުލާފައިވާ ކަމަށް ތަފާސްހިސާބުތަކުން ދައްކައެވެ.
ވީއައިއޭގެ ކާގޯ ހިދުމަތް ފުޅާކުރުމަށް އެމްއޭސީއެލްއިން ގެންދަނީ ގިނަ މަސައްކަތްތަކެއް ކުރަމުންނެވެ. ޝެޑިއުލްކޮށްގެން މުދާ އުފުލާ އެއާލައިންތަކާއެކު އެ ކުންފުނިން ދަނީ މަސައްކަތް ކުރަމުންނެވެ. އަދި ދަތުރުތަކުގެ އަދަދު އިތުރުކޮށް އިތުރު ރޫޓުތައް ތައާރަފްކުރުމަށް ވެސް ދަނީ މަސައްކަތް ކުރަމުންނެވެ.
ވެލާނާ އެއާޕޯޓުން ފޯރުކޮށްދޭ ކާގޯގެ ހިދުމަތްތައް ފުޅާކުރުމަކީ މި ސަރުކާރުގެ ވަރަށް ބޮޑު ތަސައްވަރެކެވެ.
ކިޔުންތެރިންގެ ހިޔާލު