ލ. އަތޮޅުން ރޭ ފުރައިގެން ދަތުރުކުރަނިކޮށް ގެއްލިގެން ހޯދަމުން ދިޔަ “ކޮލަމާ” ނަމަކަށް ކިޔާ ބޯޓު ފެނިފައިވާ ކަމަށް ފުލުހުން ބުނެފިއެވެ. އަދި ބޯޓުގެ ކެޕްޓަން ގއ. ވިލިނގިލީ ހޮސްޕިޓަލަށް ގެންދިއުމުގެ މަސައްކަތް ކުރަމުން އަންނަ ކަމަށް ވެސް ފުލުހުން ހާމަކޮށްފައިވެއެވެ.
މި ބޯޓު ގެއްލިގެން ރޭ ވަނީ އެމްއެންޑީއެފުން އާންމުންގެ އެހީތެރިކަމަށް އެދިފައެވެ.
ފުލުހުން މިއަދު ބުނީ، ގެއްލިގެން ހޯދަމުން ދިޔަ “ކޮލަމާ” ބޯޓު ފެނިފައިވަނީ އެކެފަރަ ސަރަހައްދުން ކަމަށެވެ. ފުލުހުންގެ ޓީމެއް މިހާރު އެ ސަރަހައްދުގައި ހަރަކާތްތެރިވަމުން އަންނަ ކަމަށް ވެސް ފުލުހުން މައުލޫމާތު ދީފައިވެއެވެ.
ބޯޓުގެ ކެޕްޓަންގެ ހާލަތާ ގުޅޭގޮތުން ފުލުހުން ބުނީ، ކެޕްޓަން ގއ. ވިލިނގިލީ ހޮސްޕިޓަލަށް ގެންދިއުމަށް ފުލުހުންގެ ލޯންޗެއް މިހާރު ދަތުރުކުރަމުން އަންނަ ކަމަށެވެ. ނަމަވެސް ކެޕްޓަންގެ ސިއްހީ ހާލަތު މިވަގުތު ސާފު ނުވާ ކަމަށް ފުލުހުން ހާމަކޮށްފައިވެއެވެ.
މި ހާދިސާއާ ގުޅިގެން ކޮލަމާފުށިން ވާހަކަ ދެއްކި މީހަކު ކުރިން ބުނެފައިވަނީ، ކެޕްޓަންގެ ޚަބަރު ހުސްވެފައިވާ ކަމަށެވެ. ނަމަވެސް އޭނާއަށް މިކަމާ ގުޅޭ އިތުރު މައުލޫމާތެއް އެނގިފައިނުވާ ކަމަށް ވަނީ ބުނެފައެވެ.
މިހާރު ކެޕްޓަން ހޮސްޕިޓަލަށް ގެންދިޔުމުގެ މަސައްކަތް ކުރިއަށްދާއިރު، އޭނާގެ ސިއްހީ ހާލަތާ ގުޅޭގޮތުން އިތުރު މައުލޫމާތެއް ލިބިފައިނުވެއެވެ.
ކިޔުންތެރިންގެ ހިޔާލު