ދިވެހި އަސްކަރިއްޔާގައި 37 އަހަރު ދުވަހު އިޚްލާޞްތެރި ޚިދުމަތް ކުރެއްވުމަށްފަހު، ބްރިގޭޑިއަރ ޖެނެރަލް އަޙްމަދު ނަޝީދު ޝަރަފުވެރިކަމާއެކު ސިފައިންގެ ޚިދުމަތުން ރިޓަޔަރކުރައްވައިފިއެވެ.
އެމަނިކުފާނުގެ ދިގު ޚިދުމަތުގެ އަގު ވަޒަންކުރުމުގެ ގޮތުން، ބަންޑާރަކޮށީ އޮޑިޓޯރިއަމްގައި ވަނީ ޚާއްޞަ ރަސްމިއްޔާތެއް ބާއްވާފައެވެ.
މި ރަސްމިއްޔާތުގައި، ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުޙައްމަދު މުޢިއްޒު ދެއްވާ ޚާއްޞަ ސިޓީފުޅު، ބްރިގޭޑިއަރ ޖެނެރަލް ރިޓަޔަރޑް އަޙްމަދު ނަޝީދުއާ ޙަވާލުކޮށްދެއްވީ ދިފާޢީ ވަޒީރު މުޙައްމަދު ޣައްސާން މައުމޫނެވެ. އަދި އެމްއެންޑީއެފުން ދެއްވާ ސިޓީފުޅާއި އިޚްލާޞްތެރި ޚިދުމަތް ރަމްޒުކޮށްދޭ ޑެކަރޭޝަން ބޯޑު، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ ޙަވާލުކޮށްދެއްވިއިރު، ރިޓަޔަރމަންޓްގެ ރަމްޒީ ކާޑު ޙަވާލުކޮށްދެއްވީ ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޣިޔާޘްއެވެ.
އެމްއެންޑީއެފުން ވިދާޅުވީ ބްރިގޭޑިއަރ ޖެނެރަލް އަޙްމަދު ނަޝީދު ސިފައިންގެ ޚިދުމަތުން ރިޓަޔަރކުރެއްވިއިރު ހުންނެވީ ޑައިރެކްޓަރޭޓް އޮފް ލޮޖިސްޓިކްސް އެންޑް ރިސޯސް މެނޭޖްމަންޓް (ޖޭ4/ޖޭ8)ގެ ޑައިރެކްޓަރ ޖެނެރަލް އަދި އޯޑްނަންސް ސަރވިސްގެ ކޮމާންޑަރގެ މަޤާމުގައިކަމަށެވެ. އަދި އަހުމަދު ނަޝީދުގެ ދިގު އަސްކަރީ ޚިދުމަތުގައި، ލޮޖިސްޓިކްސް، ސެކިއުރިޓީ އަދި ސަޕްލައިގެ އެކި ދާއިރާތަކުން ގިނަ ޒިންމާތަކެއް އުފުއްލަވާ، އެކި މަޤާމުތަކުގައި އިޚްލާޞްތެރިކަމާއެކު ޚިދުމަތް ކުރައްވާފައިވާކަމަށް އެންއެންޑީއެފުން ވިދާޅުވިއެވެ.
ކިޔުންތެރިންގެ ހިޔާލު