ރާއްޖޭގެ މަސްވެރިކަމުގެ ސިނާޢަތު ތަރައްޤީކޮށް، މަސްވެރިންނަށް އެކަށީގެންވާ އަގެއް ހޯދައިދިނުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، މިފްކޯއިން މި އޮގަސްޓު މަހުގެ ތެރޭގައި ފުވައްމުލައް ސިޓީ އިން މަސް ގަންނަން ފަށާނެ ކަމަށް އެ ކުންފުނިން މިއަދު ވަނީ ހާމަކޮށްފައެވެ. މިކަމަށްފަހު ފުވައްމުލަކުން ދާއިމީކޮށް މަސްގަތުމުގެ އިންތިޒާމު ހަމަޖެހިގެންދާނެ ކަމަށްވެސް މިފްކޯއިން ބުނެއެވެ.
މިފްކޯއިން މިކަން ހާމަކޮށްފައިވަނީ، އެ ކުންފުނީގެ ސީއީއޯ ރިޓަޔަޑް ބްރިގޭޑިއާ ޖެނެރަލް ފަރުހަތު ޝަހީރު ފުވައްމުލަކަށް ކުރެއްވި ދަތުރުފުޅެއްގައި ފުވައްމުލައް ސިޓީގެ ކައުންސިލާއި ބައްދަލުކުރައްވައި ދެއްކެވި ވާހަކަފުޅުގައެވެ.
ފަރުހަތު ވިދާޅުވީ، ފުވައްމުލައް ސިޓީގައި މިފްކޯއިން ޤާއިމްކުރާ މަސް ޕްރޮސެސްކުރާ މަރުކަޒުގެ މަސައްކަތް މި އަހަރު ނިމުމުގެ ކުރިން ނިންމާ، އެތަން އޮޕަރޭޝަނަށް ގެނައުމަށް މަސައްކަތް ކުރަމުންދާ ކަމަށެވެ. މި މަރުކަޒު ނިމުމުން، ފުވައްމުލައް ސިޓީގެ ރައްޔިތުންނަށް ޕްރޮސެސްކޮށްފައި ހުންނަ މަސް ގަންނަން ލިބޭނެ އިންތިޒާމުވެސް ހަމަޖެހިގެންދާނެ ކަމުގެ ޔަގީންކަން ފަރުހަތު ވަނީ ދެއްވާފައެވެ.
މަސްވެރިކަމުގެ ސިނާޢަތަށް މިހާރު ދިމާވެފައިވާ އެންމެ ބޮޑު އެއް ގޮންޖެހުމަކީ، މަސްވެރިން ބާނާ މަސް އަގުއެއްނުކޮށް، ރޯމަހުގެ ގޮތުގައި އެކްސްޕޯޓްކުރަން ޖެހުމުން މަހަށް ލިބެންޖެހޭ ހަމަ އަގު ނުލިބުމެވެ. މި މައްސަލައަށް ހައްލެއް ހޯދައިދިނުމަށާއި، މަހަށް އަގުއެއްކޮށްގެން ބޭރުކުރުމަށް ޚާއްޞަ އިސްކަމެއް ދީގެން ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން، ރާއްޖޭގެ ތިން ސަރަހައްދެއްގައި މަސް ޕްރޮސެސްކުރާ ތިން ކާރުހާނާއެއް ތަރައްގީކުރުމަށް ނިންމާ، އެތަންތަނުގެ ޢަމަލީ މަސައްކަތްތައް ވަނީ ފަށާފައެވެ. މި އަހަރު ނިމުމުގެ ކުރިން އެތަންތަން އޮޕަރޭޝަނަށް ގެނައުމުގެ މަސައްކަތްވެސް މިހާރު ދަނީ ހަލުވިކަމާއެކު ކުރިއަށެވެ.
ކިޔުންތެރިންގެ ހިޔާލު