ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ އުދުވާނުގައި އެމެރިކާގެ ބައިވެރިވުން އޮތް މިންވަރު ފެނި ހާމަވަމުންދާ ކަމުގައި ފަލަސްޠީނުގެ ރައީސް މަޙްމޫދު އައްބާސް ވިދާޅުވެއްޖެއެވެ.

އޭނާ މިހެން ވިދާޅުވެފައި މި ވަނީ، ޔަހޫދީންގެ އުދުވާންތައް ހުއްޓައިލާ، ޣައްޒާގެ ރައްޔިތުންނަށް އިންސާނީ އެހީގެ ސާމާނު ފޯރުކޮށްދޭން ގޮވައިލާ އދގެ ސަލާމަތީ މަޖިލީހަށް ހުށަހެޅި ޤަރާރު އެމެރިކާއިން ވީޓޯ ކުރުމާ ގުޅިގެންނެވެ. ޔަހޫދީންގެ ގަތުލުއާންމު ހުއްޓުމަކަށް ގެނައުމަށް ގޮވައިލާ އެ މަޖިލީހަށް ޤަރާރެއް ހުށަހަޅާފައި ވަނީ އެކުވެރި ޢަރަބި އިމާރާތް (ޔޫއޭއީ)ންނެވެ.

ޔޫއޭއީގެ ޤަރާރު ހުށަހަޅާފައި ވަނީ، އދގެ ސެކްރެޓަރީ ޖެނެރަލް އެންތޯނިޔޯ ގުތެރޭޝްގެ އެދިވަޑައިގަތުމުގެ މަތިން އދގެ ސަލާމަތީ މަޖިލީހުން ބޭއްވި ބައްދަލުވުމެއްގައެވެ. މި ބައްދަލުވުން ބާއްވަން ގުތެރޭޝް އެދިވަޑައިގަންނަވާފައި ވަނީ، އދގެ ޗާޓަރުގެ 99 މާއްދާއިން އޭނާއަށް ލިބިވަޑައިގަންނަވާ ބާރުގެ ދަށުންނެވެ. އެއީ، ސެކްރެޓަރީ ޖެނެރަލްގެ މަޤާމުގައި ހުންނަވާ ބޭފުޅަކަށް ލިބިވަޑައިގަންނަވާ އެންމެ ބާރުގަަދަ ޑިޕްލޮމެޓިކް ބާރެވެ. ނަމަވެސް، އެމެރިކާ ވީޓޯއާ އެކު، މަޖިލީހުގެ ބައްދުވުމާއި ޤަރާރު މި ދިޔައީ ފަނުފުލުންނެވެ.

މި ކަމާމެދު ހިތްހަމަނުޖެހުން ފާޅު ކުރައްވަމުން އައްބާސް ވިދާޅުވީ، އެމެރިކާގެ އަމަލުތަކާ އެކު، ފަަލަސްޠީނުގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ހަނގުރާމައިގެ ކުށްތަކުގައި އެމެރިކާގެ ބައިވެރިވުން އޮތް މިންވަރު ހާމަވެގެން ގޮސްފައިވާ ކަމުގައެވެ. އަދި، ޣައްޒާގެ މައުސޫމް ކުޑަކުދިންނާއި އަންހެނުންނާއި އުމުރުން ދުވަސްވީ މީހުން ގަތުލު ކުރަމުންދާއިރު، އެމެރިކާއިން އެ ކަމުގެ ޒިންމާ އުފުލަން ޖެހޭނެ ކަމުގައެވެ.

އައްބާސް މި ކަމާ މެދު ހިތްހަމަނުޖެހުން ފާޅު ކުރައްވާފައިވާއިރު، ޔަހޫދީންގެ އުދުވާންތައް ހިންގަމުން ދަނީ އެމެރިކާގެ ރުހުމާއި، އެއްބާރުލުމާއި އެހީތެރިކަމާ އެކުގައި ކަން މުޅި ދުނިޔެ ވެސް ދަނެވެއެވެ. ޣައްޒާގެ ޢާންމު ރައްޔިތުން ދިރިއުޅޭ ގެދޮރަށް އަޅަމުންދާ ބޮންތަކަކީ، އަދި ޙަމަލަދިނުމަށް ބޭނުން ކުރަމުންދާ މިސައިލްތަކަކީ، އެމެރިކާގެ އަސްކަރީ އެހީގެ ދަށުން ޔަހޫދީންނަށް ފޯރުކޮށްދީފައިވާ ތަކެތި ކަން މުޅި ދުނިޔެ ވެސް ޤަބޫލު ކުރެއެވެ.

އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 17,700 އަށް އަރާފައެވެ. އޭގެ ތެރޭގައި 6,500 އަށްވުރެ ގިނަ ކުޑަކުދިން ހިމެނެއެވެ. އަދި، ގިނަ ޢަދަދެއްގެ އަންހެނުންނާއި އުމުރުން ދުވަސްވީ މީހުން ހިމެނެއެވެ. ޣައްޒާގެ ޞިއްޙަތާ ބެހޭ ވުޒާރާގެ ތަރުޖަމާނު އަޝްރަފް އަލް-ޤުދްރާ ވިދާޅުވީ، ޔަހޫދީންގެ އުދުވާނުގައި ޒަޚަމު ކޮށްލާފައިވާ މީހުންގެ ޢަދަދު މިހާރު 48,000 އަށްވުރެ މައްޗަށް އުފުލިފައިވާ ކަމުގައެވެ.