ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ގެ އައު ޓާމިނަލް ”ރީތި ވާނީ“ އެ ޓާމިނަލްގެ ސަބަބުން ރާއްޖޭގެ އިގްތިޞާދު ކުރިއަރައި، ރާއްޖެ ޖެހިފައިވާ ”ދަރަނީގެ ދަންތުރަ“ އިން ސަލާމަތް ވާނަމަ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ވީއައިއޭގެ އައު ޓާމިނަލްގެ ފުރިހަމަ ކަމާއި ރީތި ކަމުގެ އަޑުތައް ގަދަވެފައިވާ މި ދަނޑުވަޅުގައި، ރައީސް ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، ކޮންކްރީޓާއި، ބިއްލޫރި އަދި ޕްލާސްޓިކްގެ ބޭނުންކޮށްގެން އިމާރާތްކުރުމަކީ ކުރިއެރުން ކަމަށް ދެއްކުމަކީ ހަނިވިސްނުމެކެވެ.
ރައީސް ނަޝީދު ވިދާޅުވީ، ހަމައެކަނި ބޭރުފުށުން ރީތިކޮށް އިމާރާތްކުރުމަކުން އެއީ ހަގީގީ ތަރައްޤީއަށް ނުވާނެ ކަމަށެވެ.
”ވެލާނާ އެއަރޕޯޓްގެ އައު ޓާމިނަލްވެސް ރީތިވާނީ “ވަޅި ރީތީ ތޫނުކަމަށް” ބުނާ މިސާލުގަ“ ރައީސް ނަޝީދު ވިދާޅުވިއެވެ.
މިއާއެކު ރައީސް ނަޝީދު ވިދާޅުވީ، އައު ޓާމިނަލް ވެސް ރީތިވާނީ، ރާއްޖެއަށް އޭގެ ފައިދާ ލިބިގެން ކަމަށެވެ.
އައު އެއަރޕޯޓްގެ ސަބަބުން ފަތުރުވެރިންގެ އަދަދު އިތުރުވާ މިންވަރާއި، އިޤްތިޞާދު ކުރިއަރައި، ދައުލަތުގެ އާމްދަނީ އިތުރުވެ، ދަރަނީގެ ދަންތުރައިން ސަލާމަތްވެވޭނެ މަގެއް ފެނިއްޖެނަމަ ވެލާނާ އެއަރޕޯޓް ވަރަށް ރީތިވާނެ ކަމަށެވެ.
Concrete, bihloori adhi plastic ge avaigai jehi, eie tharahgee kamah dhekenee nama eie hani visnumeh. Velaanaa airport ge aa terminal ves reethi vaanee, valhi reethee thoonu kamah bunaa misaaluga. Aa airport ge sababun Touristun annavaru ithuruvaa minvaraai igthisoadhu kuri araa,…
— Mohamed Nasheed (@MohamedNasheed) July 16, 2025
ވީއައިއޭ ޓާމިނަލް ހުޅުވުން އޮތީ ދިވެހީންގެ މިނިވަން ކަމުގެ 60 އަހަރު ފުރޭ މި މަހުގެ 26 ވަނަ ދުވަހު އެވެ.
ވީއައިއޭގެ އާ ޓާމިނަލަކީ 72.000 އަކަ މީޓަރު ބޮޑު އަދި އަހަރަކު 7.5 މިލިއަން ފަސިންޖަރުންނަށް ހިދުމަތް ދިނުމަށްޓަކައި ފަރުމާކޮށްފައިވާ ޓާމިނަލެކެވެ. މި ޓާމިނަލް ބޭނުންކުރާ ފަސިންޖަރުންނަށް މަތީ ފަންތީގެ ހިދުމަތް ފޯރުކޮށްދިނުމަށްޓަކައި ދިވެހިވަންތަ ފަރުމާތަކާއެކު 47 ޗެކިން ކައުންޓަރާއި ސެލްފް ސާވިސްގެ 6 ކިއޮސްކާއި ސީޕްލޭން ފަސިންޖަރުންނަށް ހާއްސަ 24 ކައުންޓަރެއް ގާއިމްކޮށްފައި ވެ އެވެ.
ކިޔުންތެރިންގެ ހިޔާލު