ރައްޔިތުންގެ މަޖިލީހުގެ ނައިބުރައީސް އަހުމަދު ނާޒިމް މަގާމުން ވަކި ކުރުމަށްޓަކައި ބާއްވާ ޖަލްސާ އަންނަ އާދީއްތަ ދުވަހަށް ތާވަލް ކުރުމަށް ނިންމައިފިއެވެ.
މިއީ މަޖިލީހުގެ ދައުރުން ބޭރުގައި ބޭއްވުމަށް ހަމަޖެހިފައިވާ ޚާއްސަ ޖަލްސާއެކެވެ.
ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ނާޒިމް މަގާމުން ވަކި ކުރަން ނިންމީ އޭނާ ވަކި ސިޔާސީ ފިކުރަކަށް ބުރަވެ މަސައްކަތް ކުރައްވާ ކަމަށް ބުނެއެވެ. ޕީއެންސީން މަޖިލީހަށް ހުށަހެޅި ގަރާރުގައި ބުނެފައިވަނީ ނާޒިމް މަގާމުގެ ނުފޫޒުން ނާޖާއިޒު ފައިދާ ނަގައި ފިތުނަ އުފައްދަމުންދާ ކަމަށެވެ.
“މަގާމުގެ ނުފޫޒުން ނާޖާއިޒު ފައިދާ ނަގައި ފިތުނަ އުފައްދައި ވަކި ފަރާތަކަށް ބުރަވެ މަސްލަހަތު ގެއްލޭ ގޮތަށް ތަކުރާރު ކުރަމުންދާތީ އާއި މަޖިލީހުގެެ އެންމެހާ މަސައްކަތްތަކުގައި ވަކި ސިޔާސީ ފިކުރަކަށް ބުރަވެ ތައައްސުބުވެފައިވުމުގެ އިތުރަށް މަޖިލީހުގެ މަސްލަހަތު ގެއްލުވާލަން ނައިބު ރައީސް ހިތްވަރު ދީ ޒިންމާއިން ބަރީއަވެފައިވާތީ،” ޕީއެންސީގެ ގަރާރުގައި ބަޔާންކޮށްފައިވެއެވެ.
ނާޒިމް މަގާމުން ވަކި ކުރުމުގެ މަސައްކަތް ފަށާފައި ވަނިކޮށް، އޭނާ މިހާރު ވަނީ ރާއްޖެ ދޫކޮށް ވަޑައިގެންފައެވެ. ނާޒިމް ފުރާވަޑައިގަތީ އޭނާ ހައްޔަރު ކުރަން އުޅޭ ކަމުގެ އަޑުތަކެއް ފެތުރިފައިވާ ދަނޑިވަޅެއްގައެވެ.
އަހުމަދު ނާޒިމަކީ ރާއްޖޭގެ ސިޔާސީ ދާއިރާގައި ހުންނެވި އެންމެ ތަޖުރިބާކާރު އެއް ބޭފުޅާއެވެ. މީގެ ކުރިން 2009 އިން 2015 އަށް މަޖިލީހުގެ ނައިބު ރައީސްކަން ކުރެއްވި ނާޒިމަކީ ކުރީގެ ރައީސް ޔާމީންގެ އަރިސް ބޭފުޅެކެވެ. ނަމަވެސް 2015 ވަނަ އަހަރު މަކަރާއި ހީލަތުގެ ކުށުގައި 25 އަހަރަށް ޖަލަށްލުމުން، ބޭސްފަރުވާއަށް ފުރާވަޑައިގެން އިނގިރޭސިވިލާތުން ސިޔާސީ ހިމާޔަތް ހޯއްދެވިއެވެ.
ނާޒިމް އަލުން ސިޔާސީ މައިދާނަށް އެނބުރި ވަޑައިގަތީ 2018 ވަނަ އަހަރު ސުޕްރީމް ކޯޓުން އޭނާގެ މައްޗަށް އޮތް ހުކުމް ބާތިލް ކުރުމާ ގުޅިގެންނެވެ. އާދީއްތަ ދުވަހުގެ ޖަލްސާއަކީ ނާޒިމްގެ ސިޔާސީ މުސްތަގުބަލާ މެދު ގޮތެއް ނިންމާނެ މުހިންމު ޖަލްސާއަކަށް ވާނެއެވެ.
ކިޔުންތެރިންގެ ހިޔާލު