ދިވެހިރާއްޖޭގައި ނޫސްވެރިކަމުގެ މިނިވަންކަމަށް ސަރުކާރުން ހުރަސްއަޅަމުންދާ ކަމަށް ބުނެ، ރާއްޖޭގެ ބައެއް މީޑިއާތަކުން ޚަބަރު ފެތުރުން ހުއްޓާލައި ކުރިއަށްގެންދާ ބްލެކްއައުޓް އިހުތިޖާޖާ ގުޅިގެން އިދިކޮޅު އެމްޑީޕީގެ ރައީސް ޢަބްދުﷲ ޝާހިދު ކަންބޮޑުވުން ފާޅުކުރައްވައި، ހައްޔަރުކޮށްފައިވާ ނޫސްވެރިންނާއި އެކްޓިވިސްޓުން ވަގުތުން މިނިވަންކުރުމަށް ގޮވާލައްވައިފިއެވެ.
ރާއްޖޭގެ މަޝްހޫރު އޮންލައިން ނޫސްތައް ކަމަށްވާ ‘އަދަދު’، ‘ދައުރު’، ‘އައްޑޫލައިވް’ އަދި ‘މޯލްޑިވްސް އިންޑިޕެންޑެންޓް’ އިން ވަނީ ސަރުކާރުން މީޑިއާތަކަށް ކުރާ ފިއްތުންތަކާ ދެކޮޅަށް އަޑުއުފުލުމަށްޓަކައި ޚަބަރު ފެތުރުން ވަގުތީގޮތުން ހުއްޓާލާފައެވެ.
މިކަމާ ގުޅިގެން ސޯޝަލް މީޑިއާ މަންސަ ‘އެކްސް’ (X) ގައި ކުރެއްވި ޕޯސްޓެއްގައި ޝާހިދު ވިދާޅުވީ، ރާއްޖޭގައި ނޫސްވެރިކަމުގެ މިނިވަންކަމަށް ސަރުކާރުން ދެމުންދާ ހަމަލާތައް އިތުރުވަމުންދާތީ އެކަމާ ދެކޮޅަށް މީޑިއާތަކުން ކުރިއަށްގެންދާ އާދަޔާޚިލާފު އިހުތިޖާޖެއް ކަމަށެވެ.
Leading Maldivian newsrooms, including @AdhadhuMV, @Dhaurunews , @addulive , and @IndependentMV , have suspended publication in a coordinated blackout to protest the escalating assault by the government on press freedom in the Maldives.
This extraordinary protest follows the…
— Abdulla Shahid (@abdulla_shahid) May 19, 2026
ޝާހިދު ފާހަގަކުރެއްވި ގޮތުގައި، މީޑިއާތަކުން މި ފިޔަވަޅު އަޅަން މަޖުބޫރުވީ ‘އަދަދު’ ނޫހުގެ ނޫސްވެރިން ކަމަށްވާ މުޙައްމަދު ޝާހުޒާން އާއި މުޙައްމަދު ލީވާން އެއްވެސް އުސޫލެއް ނެތް ގޮތަކަށް ޖަލަށްލުމާއި، ނޫސްވެރިކަން ހުއްޓުވުމަށް ފުޅާދާއިރާއެއްގައި ޖިނާއީ އަމުރުތައް ނެރުމުގެ އިތުރުން ‘އަދަދު’ ނޫހުގެ ނިއުސްރޫމަށް ފުލުހުން ރޭޑްކުރުމާ ގުޅިގެންނެވެ.
މީގެއިތުރުން، މީޑިއާގެ މިނިވަންކަމުގެ ދިފާއުގައި ތެދުވެ ޑިމޮކްރަސީގެިހަރަކާތްތެރިން ކަމަށްވާ ލޫކަސް ޖަލީލް، މުޙައްމަދު ޝާމިން އަދި މުޝައްފައު ހައްޔަރުކޮށްފައިވާތީ އެކަމަށްވެސް ޝާހިދު ވަނީ ފާޑުވިދާޅުވެފައެވެ.
“އަމިއްލަ ވަޒީފާގެ މަސްއޫލިއްޔަތު އަދާކުރިކަމަށްޓަކައި އެކަނި ޖަލަށްލާފައިވާ ނޫސްވެރިންނާއި، ނޫސްވެރިކަމުގެ މިނިވަންކަން ދިފާއުކޮށް އެމީހުންގެ ޑިމޮކްރެޓިކް ހައްގުތަކުގެ ބޭނުން ހިފުމުގެ ތެރޭގައި ހައްޔަރުކުރި ސުލްހަވެރި ހުރިހާ އިހުތިޖާޖުވެރިން ވަގުތުން މިނިވަންކުރުމަށް އަޅުގަނޑު ގޮވާލަން،” ޝާހިދު ވިދާޅުވިއެވެ.
ޝާހިދު އިތުރަށް ވިދާޅުވީ، މިނިވަން ނޫސްވެރިކަމަކީ ކޮންމެ ޑިމޮކްރަސީއެއްގެވެސް ދިފާއީ ރޮނގު ކަމަށާއި، ނަމަވެސް މިއަދު ދިވެހިރާއްޖޭގައި އެ ރޮނގަށް ދަނީ މެދުނުކެނޑި ހަމަލާ އަމާޒުވަމުން ކަމަށެވެ.
މި މައްސަލައާ ގުޅިގެން ނޫސްވެރިންގެ ޖަމްޢިއްޔާތަކުންނާއި އާންމުންވޯޓަރެސް ސަރުކާރަށް ދަނީ ބޮޑެތި ފާޑުކިޔުންތަކެއް އަމާޒު ކުރުވަމުންނެވެ.
ކިޔުންތެރިންގެ ހިޔާލު