މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އިދާރީ ހިންގުން މިހާރު އޮތް ގޮތުން އިންސާފުވެރި އިންތިޚާބެއް ބޭއްވިދާނެ ކަމަށް ގަބޫލުނުކުރެވޭތީ، އެ ޕާޓީގެ ޗެއަރޕާސަންގެ މަގާމަށް ވާދަނުކުރައްވަން އެމްޑީޕީގެ ކުރީގެ ނައިބު ރައީސް އަލްހާން ފަހުމީ ނިންމަވައިފިއެވެ.
އަލްހާން މިކަން ހާމަކުރެއްވީ އެކްސްގައި ކުރެއްވި ޕޯސްޓެއްގައެވެ. އޭނާ ވިދާޅުވީ ޕާޓީގެ އިދާރީ އިންތިޒާމުތައް ހުރި ގޮތުން މިނިވަން އަދި އިންސާފުވެރި އިންތިޚާބެއް ބޭއްވޭނެ ފަދަ މާހައުލެއް އޮތް ކަމަށް ފެނިވަޑައިނުގަންނަވާ ކަމަށެވެ.
ޕަޓީގެ އިދާރީ ހިންގުން އޮތް ހާލަތުން، އިންސާފުވެރި އިންތިޚާބެއް ބޭއްވިދާނެކަމަށް ނުފެންނާތީ، އެމްޑީޕީގެ ޗެއަރ ޕާރސަންކަމަށް ކުރިމަތިލާން އަޅުގަނޑު ނިންމި ނިންމުން ބަދަލުކޮށް، ކުރިމަތި ނުލާން ނިންމައިފިން!
— Alhan Fahmy • AF (@AlhanFahmy) April 30, 2026
އެހެންކަމުން، ކުރިން އެ މަގާމަށް ކުރިމަތިލުމަށް ނިންމެވި ނިންމެވުން ބަދަލުކޮށް، މިފަހަރުގެ އިންތިޚާބުގައި ވާދަނުކުރަން ނިންމާފައިވާ ކަމަށް އަލްހާން ވިދާޅުވިއެވެ.
އެމްޑީޕީގެ ޗެއަރޕާސަންގެ މަގާމަކީ ޕާޓީގެ އިދާރީ ހިންގުމުގެ އެންމެ އިސް މަގާމަށް ވާއިރު، އަލްހާންގެ މި ނިންމެވުމާއެކު ޕާޓީގެ އެތެރޭގެ އިންތިޚާބާ މެދު އުފެދިފައިވާ ބަހުސްތައް ވަނީ އިތުރަށް ހޫނުވެފައެވެ. އަލްހާން ވަނީ މީގެ ކުރިން ވެސް އެމްޑީޕީގެ ހިންގުމުގެ ނިޒާމަށް ފާޑުވިދާޅުވެ، އިސްލާހީ ބަދަލުތަކަށް ވަކާލާތު ކުރައްވާފައެވެ.
އެމްޑީޕީގެ ޗެއަރޕާސަންގެ މަޤާމަށް ވާދަ ކުރަށްވަނީ ކުރީގެ ރައީސް މުޙައްމަދު ނަޝީދާއި، ގަލޮޅު ދެކުނު ދާއިރާގެ މެންބަރު މީކާއީލް ނަސީމެވެ.
ކިޔުންތެރިންގެ ހިޔާލު