މުޙައްމަދު ލިޓަން ނަމަކަށް ކިޔާ ބަންގުލަދޭޝް ރައްޔިތެއް މަރާލިކަން ސާބިތުވެ، މި މައްސަލާގައި ހިމެނޭ މުޙައްމަދު ނިޒާމް 25 އަހަރަށް ޖަލަށްލާން ޙުކުމްކޮށްފިއެވެ.
މި ޙުކުމާއި ގުޅިގެން ދިވެހި ފުލުހުންގެ ޚިދުމަތުން ބުނީ އެ މުއައްސަސާއިން ތަޙުޤީޤުކުރި، އެނގިހުރެ މީހަކު މަރައިލުމުގެ މައްސަލައެއްގައި ދައުވާ އުފުލި މީހެއްގެ މައްޗަށް ކުށް ސާބިތުވެ 25 އަހަރަށް ޖަލަށް ލުމަށް ކޯޓުން ހުކުމް ކޮށްފައިވާ ކަމަށެވެ.
މި މައްސަލައިގައި ދައުވާ އުފުލާފައިވަނީ ގދ. ތިނަދޫ / މަނާރު، މުޙައްމަދު ނިޡާމް (48އ) ގެ މައްޗަށެވެ. އޭނާގެ މައްޗަށް ދައުވާ އުފުލާފައިވަނީ (ގާނޫނު ނަންބަރު 9/2014) ދިވެހިރާއްޖޭގެ ގާނޫނުލްއުގޫބާތުގެ ދަށުންނެވެ.
ބަންގްލަދޭޝްގެ ރައްޔިތެއްކަމަށްވާ މުހައްމަދު ލިޓަން 35، މަރުގެ މައްސަލަ ފެންމަތިވީ 2023 ވަނަ އަހަރުގެ ޑިސެމްބަރު ފަހުކޮޅުގައި މި 2 މީހުން ގެއްލުމުންނެވެ. މި ދެމީހުންނަކީ ކުންފުންޏެއްގެ ދޯންޏެއްގައި މަސައްކަތްކުރަމުން ދިޔަ ދެ މީހުންނެވެ. ނަމަވެސް މި 2 މީހުން ގެއްލިގެން ހޯދުމުގެ މަސައްކަތް ކުރަމުން ދަނިކޮށް، ފުލުހުން ނިޒާމު ހޯދީ ސައްޔިދުކިލެގެފާނު މަގުގައި ހުންނަ ގެސްޓުހައުސްއަކުންނެވެ.
ފުލުހުން ބުނީ މި މައްސަލައިގައި ހުށަހެޅުނު ހެކިތަކަށާއި ގާނޫނީ ބަހުސްތަކަށް ބެލުމަށްފަހު، 2026 އެޕްރީލް 22 ވަނަ ދުވަހު މުޙައްމަދު ނިޡާމްގެ މައްޗަށް ކުރިމިނަލް ކޯޓުން ހުކުމްކޮށްފައިވާ ކަމަށެވެ.
މި ކުށުގެ އުގޫބާތެއްގެ ގޮތުން މުޙައްމަދު ނިޡާމް 25 އަހަރަށް ޖަލަށްލުމަށް ކަނޑައަޅައި، ޖިނާއީ އިޖުރާއަތުގެ ގާނޫނުގެ 186 ވަނަ މާއްދާގެ ދަށުން މުޙައްމަދު ނިޡާމް، މި ދައުވާއާ ގުޅިގެން 3 ޖަނަވަރީ 2023 އިން ފެށިގެން 1 މާރިޗު 2026 އަށް، ޖުމުލަ 1154 ދުވަސް ބަންދުގައި ހުރުމުން އެ ދުވަސްތައް ހުކުމުގެ މުއްދަތުން އުނިކޮށް، މުޙައްމަދު ނިޡާމް ތަންފީޒުކުރަންޖެހޭ މުއްދަތަކީ 21 އަހަރާއި 10 މަހާއި 1 ދުވަހުގެ ޖަލު އަދަބުކަމަށް ކޯޓުން ވަނީ ކަނޑައަޅާފައެވެ.
ކިޔުންތެރިންގެ ހިޔާލު