ހައްޖާއި އުމްރާގެ ކަންތައްތަކާ ގުޅޭގޮތުން ގާނޫނެއް އެކުލަވާލުމުގެ މަސައްކަތް ކުރަމުން ގެންދަވާ ކަމަށް އިސްލާމީކަންތައްތަކާއި އައުޤާފާ ބެހޭ ވަޒީރު، ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ވަޒީރު އެހެން ވިދާޅުވީ މިއަދު މަޖިލީހަށް ވަޑައިގެން މަނަދޫ ދާއިރާގެ މެންބަރު ހުސްނީ މުބާރިކް ކުރެއްވި ސުވާލަށް ޖަވާބު ދެއްވަމުންނެވެ. ހުސްނީ މުބާރިކް ވިދާޅުވީ އުމްރާގެ އަޅުކަމަށް މީހުން ގެންދާ ކުންފުނިތަކުން އިހުމާލްވަމުން އަންނަ އަޑު އަބަދުވެސް އަހަމުންދާ އަޑެއް ކަމަށެވެ. އެކަން ހަރުދަނާ ކުރުމަށް ތަފާތު ގަވައިދުތަކަށް ބަދަލުތަކެއް ވެސް ގެނެސްފި ނަމަވެސް އެކަން ހުއްޓޭތަނެއް ނާންނަ ކަމަށާއި މި ފަހުން ވެސް އެފަދަ ކަންތައްތަކެއް ފެނިގެން ގޮސްފިއިވާ ކަމަށް ވިދާޅުވިއެވެ. އެހެންކަމުން އެކަން ހަރުދަނާކުރުމަށް ކުރައްވަމުންދާ މަސައްކަތްތަކަކީ ކޮބައިތޯ ސުވާލުކުރެއްވެވިއެވެ.
ވަޒީރު ޝަހީމް ވިދާޅުވީ އެ މައްސަލައަށް އަދުލުވެރި ހައްލެއް ގެނެވޭނީި ހާއްސަ ގާނޫނެއް އެކުލަވާލައިގެން ކަމަށެވެ. އެހެންކަމުން އިސްލާމީ ކަންކަމާއި ބެހޭ ވުޒާރާގެ ފަރާތުން ދިވެހި ރާއްޖޭގެ ހައްޖާއި އުމްރާގެ ކަންތައްތަކާއި ގުޅޭ ގޮތުން ގާނޫނެއް އެކުލަވާލުމުގެ މަސައްކަތް ކުރިއަށް ގެންދާކަމަށް ވިދާޅުވިއެވެ.
“ގާނޫނޫގެ ތެރޭގައި މޯލްޑިވްސް ހައްޖު ކޯޕަރޭޝަންގެ ދައުރު ވެސް ފުރިހަމައަށް ބަޔާންވެފައި އޮތުމާއި އަމިއްލަ ކުންފުނިތަކަށް ވެސް ދައުރެއް ބަޔާންކޮށްފައި އޮތުމާއި އެމީހުން ކުރާ ކުށްތަކަށް އަދަބު ދެވޭނެ ނުވަތަ ގާނޫނީ ގޮތުން ހަރުދަނާ ފިޔަވަޅުތަކެއް އެޅޭނެ ނިޒާމެއް ގާއިމްކުރެވޭނެ. ހަގީގަތުގައި މިކަމަކީ ކުރަން ޖެހޭ ކަމެއް. އެހެން ގައުމުތަކުގައި ވެސް އެގޮތަށް އެކަން ތަރުތީބުކޮށްފައި އޮންނަނީ. ގާނޫނީ އޮނިގަޑެއްގެ ތެރެއިން.” ވަޒީރު ޝަހީމް ވިދާޅުވިއެވެ.
ވަޒީރު ވިދާޅުވީ މިކަމަކީ ފައިސާ އާއި ގުޅުންހުރި ކަމެއް ކަމަށެވެ. އަދި މިކަމަކީ ރައްޔިތުންގެ ވަރަށް މަތީ މަސްލަހަތާއި ގުޅުންހުރި ކަމެއް ކަމަށެވެ. އެހެންކަމުން މިކަމަށް ގާނޫނެއް އަންނަން ޖެހޭ ކަމަށް ވިދާޅުވިއެވެ.
މިކަން ހުއްޓޭނީ ހަރުދަނާ ގާނޫނީ ފިޔަވަޅެއް އެޅިގެން ކަމަށާއި މާދުރު ނޫން މުސްތަގްބަލެއްގައި އެކަން ކުރައްވާނެ ކަމަށް ވަޒީރު ޝަހީމް ވިދާޅުވިއެވެ. އަދި ވިދާޅުވީ އެދެނީ މެންބަރުންގެ އަރިހުން އެކަމަށް ތާއީދުކޮށްދިނުމަށް ކަމަށެވެ.
ކިޔުންތެރިންގެ ހިޔާލު