ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ޕީއެންސީ މެންބަރު މުހައްމަދު ސިނާނުގެ ގޮނޑި ގެއްލިފައިވާ ކަމަށް ސުޕްރީމް ކޯޓުން ހުކުމް ކުރުމާ ގުޅިގެން، އެ ދާއިރާގެ ބައި-އިލެކްޝަން ޖޫން މަހުގެ ހަ ވަނަ ދުވަހު ބާއްވަން އިލެކްޝަންސް ކޮމިޝަން (އީސީ) އިން ނިންމައިފިއެވެ.
ސިނާނުގެ ގޮނޑި ގެއްލުނީ އެހެން ބަޔަކާ ގުޅިގެން އިސްލާމިކް ބޭންކުން ނެގި 3.8 މިލިއަން ރުފިޔާގެ ލޯނެއް ހުކުމާ އެއްގޮތަށް ނުދެއްކުމުގެ ސަބަބުންނެވެ. މި މައްސަލަ ބެއްލެވީ ފަސް ފަނޑިޔާރުންގެ ބެންޗަކުން ކަމަށްވާއިރު، ހުރިހާ ފަނޑިޔާރުންގެ އިއްތިފާގުން ނިންމެވީ ސިނާނުގެ ދަރަނި ސާބިތުވާ ކަމަށާއި ގޮނޑި ގެއްލިފައިވާ ކަމަށެވެ. މިއީ 20 ވަނަ ރައްޔިތުންގެ މަޖިލީހުގެ މެންބަރެއްގެ ގޮނޑި ގެއްލުމާ ގުޅޭ ގޮތުން ސުޕްރީމް ކޯޓަށް ހުށަހެޅި ފުރަތަމަ މައްސަލައެވެ.
އީސީން ނެރުނު އިއުލާނުގައިވާ ގޮތުން ބައި-އިލެކްޝަންގެ ވޯޓުލުން ކުރިއަށް ދާނީ ޖޫން ހަ ވަނަ ދުވަހު ހެނދުނު 8:00 އިން ހަވީރު 4:00 އަށެވެ. ރަސްމީ ނަތީޖާ އިއުލާން ކުރާނީ ޖޫން އަށް ވަނަ ދުވަހު ކަމަށް ވެސް އެ އިއުލާނުގައިވެއެވެ. އިންތިޚާބަށް ކުރިމަތިލުމަށް އެދޭ މީހުންނަށް މި މަހުގެ 29 ވާ ބުދަ ދުވަހުގެ 15:00 ގެ ނިޔަލަށް ފޯމު ހުށަހެޅުމުގެ ފުރުސަތު ވަނީ ހުޅުވާލައިފައެވެ. ފޯމު ބަލައިގަންނާނީ އީސީގެ އީމެއިލް މެދުވެރިކޮށް ކަމަށާއި، އީމެއިލް މެދުވެރިކޮށް ފޯމު ހުށަހެޅުމަށް ދަތިވާ ނަމަ ކޮމިޝަނަށް ހާޒިރުވެ ފޯމު ހުށަހެޅޭނެ އިންތިޒާމު ވެސް ހަމަޖެހިފައިވާ ކަމަށް އީސީން ބުންޏެވެ.
މި ގޮނޑިއަށް ވާދަކުރުމަށް އައްޑޫގެ ކުރީގެ މޭޔަރު އަބްދުﷲ ސާދިގު (ސޯބެ) ވަނީ ޝައުގުވެރިކަން ފާޅުކުރައްވައިފައެވެ. ކުރީގެ ރައީސް މުހައްމަދު ނަޝީދު ވަނީ އެ ނިންމެވުމަށް މަރުހަބާ ވިދާޅުވެ، އެއީ އުފާވެރި ޚަބަރެއްގެ ގޮތުގައި ސިފަކުރައްވައިފައެވެ. ވެރިކަން ކުރާ ޕީއެންސީއަށް މި މަޖިލީހުގައި 75 ގޮނޑީގެ ސުޕަމެޖޯރިޓީ ލިބިފައިވާއިރު، އިދިކޮޅު އެމްޑީޕީގައި މިހާރު ތިއްބެވީ 12 މެންބަރުންނެވެ.
ކިޔުންތެރިންގެ ހިޔާލު