ކުއްލި ގޮތަކަށް މަގާމުން ވަކިކުރި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބްރޭ) އާއި ލީގަލް ޑިރެކްޓަރު އަހްމަދު މައުރޫފްގެ މަގާމު އަލުން އިޔާދަކޮށް، ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) އާ ދެކޮޅަށް ހުށަހެޅި އިތުބާރު ނެތްކަމުގެ މައްސަލަ ވެސް އަނބުރާ ގެންގޮސްފިއެވެ.
މި ނިންމުންތައް ނިންމާފައިވަނީ މިރޭ ބޭއްވި އެމްޑީޕީގެ ގައުމީ މަޖިލީހުގެ ސިއްރު ބައްދަލުވުމަކަށް ފަހުގައެވެ. އެ ބައްދަލުވުމަށް ފަހު ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ޣަފޫރު ވިދާޅުވީ އިބްރޭ އާއި މައުރޫފް މަގާމުން ވަކިކުރުމަށް ފޮނުއްވި ސިޓީ މިހާރު އަނބުރާ ގެންގޮސްފައިވާ ކަމަށެވެ. ޣަފޫރާ ދެކޮޅަށް ހުށަހެޅި އިތުބާރު ނެތްކަމުގެ މައްސަލަ އަނބުރާ ގެންގޮސްފައިވާ ކަން ޕާޓީގެ ކުރީގެ ޗެއާޕާސަން ފައްޔާޒް އިސްމާއީލް ވަނީ އިއުލާން ކުރައްވައިފައެވެ.
މައުލޫމާތު ލިބޭ ގޮތުގައި މި ނިންމުންތަކަކީ ކުރީގެ ރައީސް މުޙައްމަދު ނަޝީދު ޕާޓީ ހިންގުމުގެ ކަންކަމުގައި ބައިވެރިކުރުމަށް މަޝްވަރާކޮށް އެއްބަސްވުމަކަށް އާދެވުމާ ގުޅިގެން ނިންމި ނިންމުންތަކެކެވެ.
މި މައްސަލަ ފެންމަތިވީ އެމްޑީޕީއަށް ލިބުނު ކާމިޔާބީ ފާހަގަކުރުމަށް ބޭއްވި ޖަލްސާގައި ރައީސް ނަޝީދަށް ވާހަކަފުޅުދެއްކެވުމުގެ ފުރުސަތު ނުދެއްވި މައްސަލައިގައި ޕާޓީގެ ތެރޭގައި ބޮޑެތި ޚިޔާލުތަފާތުވުންތަކެއް އުފެދުމުންނެވެ. އިބްރޭ މަގާމުން ވަކިކުރީ މިދިޔަ އަންގާރަ ދުވަހު ޕާޓީގެ އަސާސީ ގަވާއިދުގެ 70 ވަނަ މާއްދާގެ ދަށުން ކަމަށް ބުނެފައިވީ ނަމަވެސް، އިބްރޭ ވަނީ އެ ނިންމުން ގަބޫލުނުކުރައްވާ ކަމަށް ވިދާޅުވެފައެވެ.
ކިޔުންތެރިންގެ ހިޔާލު