މި އަހަރު ވެސް ދިވެހި ހައްޖުވެރިން ފުރާނީ މައްކާ ރޫޓް އިނީޝިއޭޓިވްގެ އިންތިޒާމުތަކުގެ ތެރެއިން ކަމަށް އިސްލާމިކް މިނިސްޓްރީން މިއަދު ބުނެފިއެވެ.
އެ މިނިސްޓްރީން ބުނީ މައްކާ ރޫޓްގެ ތައްޔާރީތަކަށް އަންނަ ހަފުތާގައި ސައުދީގެ ޓީމެއް ރާއްޖެ އަންނާނެ ކަމަށެވެ. މައްކާ ރޫޓް އިނީޝިއޭޓިވަކީ ހައްޖުވެރިން އަމިއްލަ ގައުމުން ފުރުމުގެ ކުރިން ދެ ގައުމުގެ އިމިގްރޭޝަނުން ކުރަންޖެހޭ ކަންކަން އަމިއްލަ ގައުމުގެ އެއާޕޯޓުގައި ތިބެ ނިންމައިގެން ފުރުމެވެ. އެހެންކަމުން ޖިއްދާ އެއާޕޯޓުގައި މަޑުކުރަން ނުޖެހި ސީދާ ހޮޓަލަށް ދެވެއެވެ.
މައްކާ ރޫޓްގައި ރާއްޖެ ހިމަނައިދިނުމަށް ސައުދީ ސަރުކާރު އަރިހުގައި އިސްލާމިކް މިނިސްޓްރީން ރަސްމީކޮށް އެދުނީ މި އަހަރުގެ މާރިޗު މަހުގައެވެ. އެ މިނިސްޓްރީން ބުނި ގޮތުގައި އެއީ ސައުދީ އަރަބިއްޔާގެ ހައްޖު މިނިސްޓްރީއާ އެކު ކުރި ގިނަ މަޝްވަރާތަކަށް ފަހުގައެވެ. އެ އިންތިޒާމުތައް ދާއިމީކޮށް ރާއްޖެއަށް ހަމަޖައްސައިދޭން ސައުދީން ނިންމީ މިދިޔަ ނޮވެމްބަރު 11 ގައެވެ.
ހައްޖު ކޯޕަރޭޝަންގެ މެނޭޖިން ޑައިރެކްޓަރު މުހައްމަދު ޝަކީލާ ހަވާލާދީ ދައުލަތުގެ މީޑިއާއިން އިއްޔެ ރިޕޯޓުކުރި ގޮތުގައި ހައްޖުގެ ހުރިހާ އިންތިޒާމެއް މިހާރު ވަނީ ހަމަޖެހިފައެވެ. ހައްޖުވެރިންގެ ފުރަތަމަ ފްލައިޓް އޮންނާނީ މެއި މަހުގެ 15 ވަނަ ދުވަހު ކަމަށް އެ ރިޕޯޓުގައިވެއެވެ.
އިސްލާމިކް މިނިސްޓްރީން ބުނީ މިދިޔަ ހައްޖުގައި ރާއްޖެއަށް މައްކާ ރޫޓްގެ ފަސޭހަތައް ލިބުނު ކަމަށާއި، އެ ތަޖުރިބާގައި ރައީސް ޑރ. މުހައްމަދު މުއިއްޒާއި ސަރުކާރުގެ މުއައްސަސާތަކާއި އެއާޕޯޓާއި ކަސްޓަމްސާއި އިމިގްރޭޝަނާއި ހައްޖު ކޯޕަރޭޝަނާއި އޭވިއޭޝަން ސެކިއުރިޓީއާއި ރައްޔިތުން ދެއްވި އެއްބާރުލެއްވުން ސައުދީ ސަރުކާރުން ފާހަގަކުރި ކަމަށެވެ. މައްކާ ރޫޓް އިނީޝިއޭޓިވަކީ 2018 އިން ފެށިގެން ސައުދީ ވިޝަން 2030 ގެ ދަށުން ތަންފީޒު ކުރަމުން އަންނަ އިނީޝިއޭޓިވެކެވެ.
ކިޔުންތެރިންގެ ހިޔާލު