މާލެއިން ފުރައިގެން ގދ. ފިޔޯރީއަށް ދަތުރުކުރި “އުދަރެސް” ބޯޓު ގިނަ ބަޔަކާއެކު ލ. މާމެންދޫ ކައިރިއަށް ބަންޑުން ޖަހާލައިފިއެވެ.
މި ހާދިސާއާ ގުޅިގެން ފުލުހުންގެ މީޑިއާ އޮފިޝަލް މިރޭ ވިދާޅުވީ، ލ. އަތޮޅު ކައިރިން ބޯޓެއް ބަންޑުން ޖަހާލައިގެން އުޅޭކަމުގެ މައުލޫމާތު ލިބިފައިވާތީ، ފުލުހުން އެ ސަރަހައްދުގައި ހަރަކާތްތެރިވަމުންދާ ކަމަށެވެ. މައުލޫމާތު ލިބިފައިވާ ގޮތުގައި މި ބޯޓުން 15 އަށްވުރެ ގިނަ މީހުން ދަތުރުކުރަމުން ދިޔައެވެ.
މި ހާދިސާ ހިނގިކަން އެނގުނީ ބޯޓުން ދަތުރުކުރި ބަންގްލަދޭޝްގެ ރައްޔިތަކު ކަނޑުވެފައި ވަނިކޮށް، ފަތާފައި ގޮސް އެ ސަރަހައްދުގައި އޮތް ރިސޯޓަކަށް އެރުމުންނެވެ. އޭނާއާ ހަވާލާދީ މައުލޫމާތު އެނގޭ މީހަކު “ހުވަދޫ މީޑިއާ” އަށް ބުނެފައިވަނީ، ބޯޓު ބަންޑުން ޖަހާލުމާއެކު އޭގައި ތިބި އެހެން މީހުން ގެއްލިފައިވާ ކަމަށެވެ.
ބޯޓުން ދަތުރުކުރި މީހުން ހޯދުމުގެ މަސައްކަތް ކަމާބެހޭ ފަރާތްތަކުން މިހާރު ދަނީ ކުރަމުންނެވެ. ނަމަވެސް، މިހާތަނަށް އެއްވެސް މީހަކު ފެނިފައިވާ ކަމުގެ ރަސްމީ މައުލޫމާތެއް ލިބިފައެއް ނުވެއެވެ. މި ހާދިސާ ހިނގަން މެދުވެރިވި ސަބަބެއް އަދި ސާފެއް ނުވެއެވެ.
ކިޔުންތެރިންގެ ހިޔާލު