މިއަދު ރާއްޖޭގައި ކުރިއަށްދާ އިންތިހާބުތަކާ ގުޅިގެން މިހާތަނަށް ޖުމްލަ 36 ޝަކުވާއެއް ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.
މިއަދު ރާއްޖޭގައި ކުރިއަށްދަނީ ތިން އިންތިހާބެކެވެ. އެއީ ލޯކަލް ކައުންސިލްތަކުގެ ބައި-އިލެކްޝަނާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ އިތުރުން، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބާއްވަން ފެނޭތޯ ރައްޔިތުންގެ ހިޔާލު ހޯދުމަށް ނަގާ ވޯޓެވެ.
އިލެކްޝަންސް ކޮމިޝަނުން މައުލޫމާތު ދެއްވި ގޮތުގައި، މިއަދު ހެނދުނު 7:00 އިން ފެށިގެން 9:00 އާ ހަމައަށް ކޮމްޕްލެއިންސް ބިއުރޯއަށް ފޯނުގެ ޒަރީއާއިން 28 ޝަކުވާއެއް ވަނީ ލިބިފައެވެ. މީގެ އިތުރުން އީމެއިލް މެދުވެރިކޮށް 7 ޝަކުވާއެއް ހުށަހަޅާފައިވާ ކަމަށް އެ ކޮމިޝަނުން ބުނެއެވެ.
ހުށަހެޅުނު ޝަކުވާތަކުގެ ތަފްސީލަށް ބަލާއިރު، ކެމްޕެއިން ކުރުން މަނާ ގަޑިތަކުގައި ކެމްޕެއިން ކުރުމާ ގުޅޭ 7 ޝަކުވާއަކާއި، އިންތިހާބީ މައުލޫމާތުތަކާ ގުޅޭ 4 ޝަކުވާއެއް ހިމެނެއެވެ. އަދި ވޯޓުލާ ސަރަހައްދާ ގުޅޭ 8 ޝަކުވާއަކާއި، ވޯޓު ކަރުދާހާ ގުޅޭ 3 ޝަކުވާއެއްގެ އިތުރުން، ވޯޓުލުމުގެ މަރުހަލާގައި ދިމާވި މައްސަލަތަކާ ގުޅޭ 2 ޝަކުވާއެއް ވަނީ ހުށަހަޅާފައެވެ. މީގެ އިތުރުން އެހެނިހެން ކަންކަމާ ގުޅޭ 5 ޝަކުވާއެއް ވެސް އީސީއަށް ވަނީ ލިބިފައެވެ.
މިއަދުގެ އިންތިހާބުތަކުގެ ވޯޓުލުން ހެނދުނު 8:00 ގައި ފަށާފައިވާއިރު، ވޯޓުލުން ކުރިއަށްދާނީ ހަވީރު 16:00 އާ ހަމައަށެވެ. މި އިންތިހާބުގައި ވޯޓުލުމުގެ ހައްގު ޖުމްލަ 294,876 މީހުންނަށް ލިބިގެންވެއެވެ. އިލެކްޝަންސް ކޮމިޝަނުން ދަނީ ހުށަހެޅޭ ޝަކުވާތައް ބަލައި، އެކަންކަމަށް އަވަސް ހައްލެއް ހޯދުމަށް މަސައްކަތް ކުރަމުންނެވެ.
ކިޔުންތެރިންގެ ހިޔާލު