ސްރީލަންކާއިން އެދިއްޖެނަމަ ތެޔޮ ފޯރުކޮށްދޭން ތައްޔާރަށް އޮތް ކަމަށް އީރާނުން ބުނެފިއެވެ.
ކޮލަމްބޯގައި ބޭއްވި ނޫސްވެރިންގެ ބައްދަލުވުމެއްގައި އީރާނުން ލަންކާއަށް ކަނޑައަޅާފައި ހުންނަވާ ސަފީރު އަލީ ރޭޒާ ޑެލްޚޮޝް ވިދާޅުވީ ކޮންމެ ވަގުތަކުވެސް ލަންކާއަށް އެހީތެރިކަން ފޯރުކޮށްދޭން އީރާން އޮތީ ތައްޔާރަށް ކަމަށެވެ.
ސަފީރު ވިދާޅުވީ، ލަންކާއިން ތެޔޮ ނުވަތަ އެނޫންވެސް ޒަރޫރީ ބޭނުންތަކަށް އެ ގައުމުގައި އެދިއްޖެނަމަ އެ ތަކެތި ފޯރުކޮށްދޭން އީރާނުން އޮތީ ތައްޔާރަށް ކަމަށެވެ.
ސަފީރު އަލީރޭޒާ ޑެލްޚޮޝް ވިދާޅުވީ އީރާނާއި އެކުވެރި ގައުމުތަކަށް ހޮރްމޫޒް ކަނޑުއޮޅި ބަންދުކޮށްފައި ނުވާނެ ކަމަށެވެ.
އަދި ލަންކާ ދަތިކަމުގެ ހާލަތުގައި އޮންނަން އީރާނުން ނޭދޭ ކަމަށާއި، ލަންކާއަކީ އީރާނަށް ވަރަށް އިހްތިރާމް ކުރާ ގައުމެއް ކަމަށް ވެސް އޭނާ ވަނީ ވިދާޅުވެފައެވެ.
އޭނާ ވަނީ އެމެރިކާގެ ޓޯޕީޑޯ ހަމަލާއެއްގައި ގެއްލުން ލިބުނު އީރާނުގެ ހަނގުރާމަމަތީ މަނަވަރު އައިރިސް ޑެނާގައި ތިބި މީހުން ސަލާމަތް ކުރުމުގައި ލަންކާއިން ކުރި މަސައްކަތްތައްވެސް ފާހަގަކުރައްވާފައެވެ.
އަދި އީރާނުގައި ދިރިއުޅޭ ސްރީލަންކާގެ ރައްޔިތުން އެނބުރި ގައުމަށް ދާން ބޭނުންވެއްޖެ ނަމަ އެ މީހުންނަށް ބޭނުންވާ އެހީތެރިކަން ފޯރުކޮށްދޭން އީރާން ސަރުކާރުން އޮތީ ތައްޔާރަށް ކަމަށްވެސް އޭނާ ވިދާޅުވެފައި ވެއެވެ.
ލަންކާއަކީ ބޭރުން ތެޔޮ އެތެރެ ކުރާ ގައުމެކެވެ.
އެ ގައުމަށް އާއްމުކޮށް ތެޔޮ ގަންނަނީ ސިންގަޕޫރު، މެލޭޝިއާ އަދި ދެކުނު ކޮރެއާ އިންނެވެ.
ކިޔުންތެރިންގެ ހިޔާލު