ކުރިއަށް އޮތް ލޯކަލް ކައުންސިލް އިންތިޚާބުގެ ކެމްޕޭނަށް އެމްޑީޕީގެ ރައީސް އަބްދުﷲ ޝާހިދު އިއްޔެ ހަވީރު ގާދިއްފުއްޓަށް ވަޑައިގެންފިއެވެ.
އިއްޔެ ހަވީރު ގާދިއްފުއްޓަށް ކުރެއްވި މި ދަތުރުފުޅަށްފަހު އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ގާދިއްފުށިން އެމަނިކުފާނަށް ވިދާޅުވި ހޫނު މަރުޙަބާއަށް އިޚްލާޞްތެރިކަމާއެކު ޝުކުރު ދަންނަވާ ކަމަށެވެ.
https://twitter.com/abdulla_shahid/status/2033556120380510499?s=20
އިންތިޚާބުގެ ކެމްޕޭން ފޯރި ގަދަވަމުން އަންނައިރު، ސަރުކާރުން ދައްކަމުންދާ ބިރުތަކަށް ފަސްޖެހުމެއް ނެތި އެމްޑީޕީގެ ޓީމު އޮތީ ވަރަށް ބަދަހިކޮށް އަދި ޖޯޝުގައި ކަމަށް ޝާހިދު ފާހަގަކުރެއްވިއެވެ. މި ދަތުރުފުޅުގައި ޝާހިދު ވަނީ ގާދިއްފުށީގައި އެމްޑީޕީގެ ޓިކެޓުގައި ވާދަކުރާ ކެންޑިޑޭޓުންނާއި ކެމްޕޭން ޓީމާ ބައްދަލުކުރައްވައި ކެމްޕެއިން ކުރިއަށްދާ ގޮތާމެދު މަޝްވަރާ ކުރައްވާފައެވެ.
މި ބައްދަލުވުމާ ގުޅޭގޮތުން ޝާހިދު ވިދާޅުވީ، އިންތިޚާބު ކާމިޔާބުކުރުމަށް އެމްޑީޕީގެ ކެންޑިޑޭޓުން ކުރަމުންދާ މަސައްކަތްތަކުގެ ތަފްޞީލް ލިބިވަޑައިގެންފައިވާ ކަމަށެވެ. އަދި އިރާދަކުރެއްވިއްޔާ އޭޕްރީލް މަހުގެ 4 ވަނަ ދުވަހު ބާއްވާ އިންތިޚާބުގައި ގާދިއްފުށީގެ ރައްޔިތުން ވޯޓު ދޭނީ އެމްޑީޕީގެ ‘ތިލަފަތަށް’ ކަމަށް ޝާހިދު ޔަގީންކަން ފާޅުކުރެއްވިއެވެ.
މި ސަރުކާރުގެ ވެރިކަމުގައި އިދިކޮޅު ފަރާތްތަކަށް ބިރުދައްކަމުންދާ ކަމަށް އެމްޑީޕީން ތުހުމަތު ކުރަމުންދާއިރު، ޝާހިދު މިމޭރުމުން ވާހަކަފުޅު ދައްކަވާފައިވަނީ ރައީސް ޑރ. މުޙައްމަދު މުޢިއްޒުގެ ސަރުކާރަށް ފާޑުވިދާޅުވަމުންނެވެ.
ކިޔުންތެރިންގެ ހިޔާލު