މިޔަންމާގެ އެންމެ ހުޅަނގު ސްޓޭޓުގެ ރަށުގެ ބާޒާރަކަށް އެ ގައުމުގެ އަސްކަރިއްޔާއިން ދިން ވައިގެ ހަމަލާއެއްގައި 17 މީހުން މަރުވެއްޖެއެވެ.
މީގެ ފަސް އަހަރު ކުރިން އަސްކަރިއްޔާއިން ބަޣާވާތެއް ކުރި ފަހުން މިޔަންމާ ވަނީ ދާޚިލީ ހަނގުރާމައިގެ ތެރޭގައެވެ. ޑިމޮކްރަސީގެ އެކްޓިވިސްޓުންނާއި ފެކްޝަންތަކުން ވަނީ ހަތިޔާރާ އެކުގައި ނުކުމެފައެވެ.
ހުޅަނގު އައްސޭރިފަށުގެ ސްޓޭޓެއް ކަމަށްވާ ރާޚައިން އަކީ އެންމެ ބޮޑަށް ގެއްލުން ލިބުނު ސަރަހައްދުތަކުގެ ތެރޭގައި ހިމެނޭ ސަރަހައްދެކެވެ. ގާތްގަނޑަކަށް އެ ސަރަހައްދު މުޅިން ވެސް ކޮންޓްރޯލް ކުރަނީ ނަސްލީ މައިނޯރިޓީ އަރަކަން އާމީ (އޭއޭ) އިން ކަމަށްވާއިރު، އެ އަސްކަރިއްޔާއިން ވަނީ އެ ސަރަހައްދު ބްލޮކްކޮށް، ގަވާއިދުން އެތަނަށް ވައިގެ ހަމަލާތަކެއް ދީފައެވެ.
އޭއޭ އާއި ލޯކަލް ވޮލަންޓިއާ ގްރޫޕަކުން ބުނި ގޮތުގައި އަސްކަރިއްޔާގެ ވައިގެ ސިފައިން އިއްޔެ ވަނީ ސްޓޭޓްގެ ވެރިރަށް ސިޓްވޭގެ އިރުއުތުރުން ގާތްގަނޑަކަށް 33 ކިލޯމީޓަރު (20 މޭލު) ދުރުގައި އޮންނަ ޕޮނާގްޔޫން ޓައުންޝިޕްގެ ޔޯއީ ންގޫ އަވަށަށް ހަމަލާދީފައެވެ.
މިކަމާ ގުޅޭ ގޮތުން މިޔަންމާގެ އަސްކަރިއްޔާގެ ތަރުޖަމާނެއްގެ ބަހެއް އަދި ލިބިފައެއް ނުވެއެވެ.
އޭއޭގެ ބަޔާނުގައި މާރުކޭޓަކަށް ދިން ހަމަލާގައި ތިން ކުޑަކުދިން ހިމެނޭ ގޮތަށް މަރުވި 17 މީހުންގެ ނަން ލިސްޓްކޮށްފައިވެއެވެ. އަދި އިތުރު 15 މީހަކު ވެސް ވަނީ މި ހަމަލާގައި ޒަހަމްވެފައެވެ.
ކިޔުންތެރިންގެ ހިޔާލު