މާލޭގެ ރައްޔިތުންނަށް ގޯތި ދޫކޮށްފައިވާ ގިރާވަރުފަޅު ހިއްކުމުގެ މަސައްކަތް އަލުން ފަށައިފި އެވެ.
ގިރާވަރުފަޅު ހިއްކުމުގެ މަސައްކަތް މިއަދު ހެނދުނު ފަށާފައިވާ ކަން އިއުލާން ކުރެއްވީ ރައީސް ޑރ. މުހައްމަދު މުއިއްޒު މިއަދު އެކްސްގައި ކުރެއްވި ޕޯސްޓެއްގަ އެވެ.
Started reclamation of Giraavaru this morning: pic.twitter.com/bsud0ehsqu
— Dr Mohamed Muizzu (@MMuizzu) January 30, 2026
ގިރާވަރުފަޅު ހިއްކުމުގެ މަސައްކަތް ފެށީ ހުޅުމާލެ ފޭސް3 ހިއްކައި ނިންމުމަށްފަހު އެވެ.
ގިރާވަރުފަޅު ހިއްކުމުގެ މަސައްކަތް ކުރަނީ ބިން ހިއްކުން އަވަސް ކުރަން ގެނައި ދެ ޑްރެޖަރު ބޭނުންކޮށްގެންނެވެ. އެ މަސައްކަތް ހަވާލުކޮށްފައިވަނީ އެމްއޭސީއެލްއާ އެވެ.
ކުރިން މި މަސައްކަތް ކުރީ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އާ ހަވާލުކޮށްގެންނެވެ. ނަމަވެސް، އެ މަސައްކަތް ހަވާލުކޮށްފައިވަނީ އެ ކުންފުންޏަށް ބިންތަކެއް ދޭން ޖެހޭ ގޮތަށް ކަމަށްވާތީ އެއްބަސްވުން ފަހުން ބާތިލްކުރީ އެވެ.
ގިރާވަރުފަޅުން ގާތްގަނޑަކަށް 90 ހެކްޓަރު ހިއްކައި ނިންމާފައި އޮތްއިރު، މި ސަރުކާރުން ވަނީ ތަނުގެ ލޭންޑް ޔޫސް ޕްލޭން ބަދަލުކޮށް، އިތުރަށް 50 ހެކްޓަރު ހިއްކަން ނިންމައިފަ އެވެ. މިހާރު އެ ފަޅުން ޖުމްލަ 219 ހެކްޓަރު ހިއްކާނެ އެވެ.
ކުރިއަށް އޮތް ތިން މަސް ދުވަހުގެ ތެރޭގައި ގިރާވަރުފަޅު ހިއްކައި ނިމޭނެ ކަމަށް ރައީސް މުއިއްޒު މިދިޔަ ޖެނުއަރީ މަހު ވިދާޅުވެފައިވެ އެވެ.
ގިރާވަރުފަޅުން ދޫކުރަނީ 1،250 އަކަފޫޓުގެ 2،605 ޕްލޮޓާއި 1،650 އަކަފޫޓުގެ 1،213 ޕްލޮޓާއި 2050 އަކަފޫޓުގެ 253 ޕްލޮޓުގެ އިތުރުން 2،450 އަކަފޫޓުގެ އެއް ޕްލޮޓެވެ.
ގިރާވަރުފަޅުގެ އާ ލޭންޑް ޔޫސް ޕްލޭނެއް ތައްޔާރުކޮށް، އެ ޕްލޭނުގެ ދަށުން ގޯތި ލިބުނު ސަރަހައްދުތައް ބަދަލުވެފައިވާތީ ގޯތީގެ ގުރު ނެގުން މާދަމާ ބާއްވަން ހައުސިން މިނިސްޓްރީން ވަނީ ނިންމައިފަ އެވެ.
ކިޔުންތެރިންގެ ހިޔާލު