ސަލްމާން ޚާންގެ އެކްޝަން ފިލްމު “ބެޓްލް އޮފް ގަލްވާން”ގެ އަންހެން ލީޑް ބަތަލާ އިއުލާނުކޮށްފިއެވެ. މި ފިލްމުގެ އަންހެން ލީޑު ރޯލުން ފެނިގެންދާނީ ބަތަލާ ޗިތުރަންގަދާ ސިންގް އެވެ.
ސަލްމާން ޚާން ޕްރޮޑަކްޝަންސްއިން އެކްސް މެދުވެރިކޮށް ޗިތުރަންގަދާ އަށް ވަރަށް ހޫނު މަރުހަބާއެއް ކިޔާފައިވާއިރު، ސަލްމާންއާއެކު ޗިތުރަންގަދާ ފިލްމެއް ކުޅޭ މިއީ ފުރަތަމަ ފަހަރެވެ.
މި ފިލްމަކީ 2020 ވަނަ އަހަރު އިންޑިއާގެ އަސްކަރިއްޔާ އާއި ޗައިނާގެ އަސްކަރިއްޔާއާ ދެމެދު ގަލްވާން ވާދީގައި ހިނގި ހާދިސާއެއްގެ މައްޗަށް ބިނާކޮށް އުފައްދާ ޕެޓްރިއޮޓިކް ޑްރާމާ ފިލްމެކެވެ. ފިލްމުގެ ޕޯސްޓަރުގައި ސަލްމާން ލޭގެ ކުލަ ތަތްތެޅިފައިވާ އަސްކަރީ ހެދުމެއްގައި ފެންނައިރު، “ކަނޑަށްވުރެ 15،000 ފޫޓަށްވުރެ މަތީގައި، އިންޑިއާއިން އެއްވެސް ބަޑިއެއް ނުޖަހައި އެންމެ ނުރައްކާތެރި ހަނގުރާމަ ކުރި” މިލިޔުން ހިމެނެއެވެ.
ފިލްމު ޑައިރެކްޓް ކުރަނީ އަޕޫރްވާ ލަކިއާއެވެ. ސަލްމާން ޚާން ފިލްމްސް އިން ޕްރޮޑިއުސް ކުރާ މި ފިލްމުގެ މިޔުޒިކް ހަދަނީ ހިމޭޝް ރެޝައްމިޔާ އެވެ. ފިލްމު ރިލީޒް ކުރާ ތާރީހެއް އަދި ހާމަކޮށްފައެއް ނުވެއެވެ.
ކިޔުންތެރިންގެ ހިޔާލު