ދިވެހިރާއްޖޭގައި ޙަޤީޤީ ޑިމޮކްރަސީއެއް ޤާއިމްވުމަކީ، އަންހެނުން ސިޔާސީ މުއައްސަސާތަކާއި، ޤައުމީ ނިންމުންތައް ނިންމުމުގެ ދާއިރާއިން އެކަހެރިކުރެވިފައި ތިބޭހާ ހިނދަކު، ޙާޞިލްކުރެވޭނެ ކަމެއް ނޫންކަމަށް ރާއްޖޭގެ ކުރީގެ ފޮރިން މިނިސްޓަރ ދުންޔާ މަޢުމޫނު ވިދާޅުވެއްޖެއެވެ. ދުންޔާ މިހެން ވިދާޅުވީ، ވިމެން އިން ޑިމޮކްރަސީގެ 10 ވަނަ އަހަރީ ދުވަހުގެ މުނާސަބަތުގައި ބޭއްވުނު ޙަފްލާގައި ވާހަކަފުޅު ދައްކަވަމުންނެވެ.
ދުންޔާ ފާހަގަކުރެއްވި ގޮތުގައި، ރައްޔިތުންގެ މަޖިލީހުގައި އަންހެނުންގެ އިންސައްތައަކީ އެންމެ 3% އެވެ. “އަދި އެންމެ ފަހުގެ އިންތިޚާބަށްފަހު ހޮވުނު ރައްޔިތުންގެ މަޖިލީހުގައި ހިމެނެނީ އެންމެ 3 އަންހެނުން. މިއީ ހަމައެކަނި ތަފާސް ހިސާބެއް ނޫން، މީގެން ދައްކުވައިދެނީ ޒަމާންތަކަކަށް ދެމިގެންގޮސްފައިވާ ޙަޤީގަތެއް- އަންހެނުން ބާރުވެރިކުުރުމަށް ކުރަމުންދާ ވަޢުދުތައް ޙަޤީތަގަކަށް ނުވުމުގެ ސަބަބުން މުހިއްމު ހުނަރުވެރިބައެއްގެ ބޭނުން ނުހިފި ދާ މަންޒަރު، ފެންނަކަމަށް” ދުންޔާ ވިދާޅުވިއެވެ.
ސިޔާސީ ދާއިރާގައި އަންހެނުންގެ ބައިވެރިވުން މަދުކަމުގެ މައްސަލައަކީ ޒަމާނުއްސުރެ ދިވެހި މުޖުތަމަޢުން ކުރިމަތިލާންޖެހިފައިވާ މައްސަލައެކެވެ. ރައްޔިތުންގެ މަޖިލީހަށް ހޮވިފައިވާ 87 މެންބަރުންގެ ތެރެއިން މިހާރު ތިބީ އެންމެ ތިން އަންހެން މެންބަރުންނެވެ.
މި ހަފްލާގައި ވާހަކަ ދައްކަވަމުން ދުންޔާ ވިދާޅުވި ގޮތުގައި، ޙަޤީޤީ ޑިމޮކްރަސީއަކުން ބޭނުންވަނީ ހަމަހަމަ ކޮށް ޖިންސަކަށް ބެލުމެއް ނެތި ޤައުމު ތަމްސީލުކުރުމަށެވެ. ޤައުމުގެ ކުރިމަގު ކަނޑައަޅާ ސިޔާސަތުތައް އެކުލަވައިލުމުގައި، އަންހެނުންނާއި ފިރިހެނުންގެ ދެޖިންސުގެ ދެމެދުގައި ހަމަހަމަ ބައިވެރިވުމެއް ނެތްނަމަ، ޤައުމީ ނިންމުންތައް ވަކި ފަރާތަކަށް ބުރަވެ، އެންމެންގެ މަޞްލަޙަތަށް ފައިދާކުރާ ނިންމުންތަކެއް ނުނިންމޭނެއެވެ.
ކިޔުންތެރިންގެ ހިޔާލު