ރަޝިއާއަށް މިއަދު މިހާތަނަށް 47 ބިންހެލުން އައިސްފައިވާ ކަމަށް ރިކޯޑް ކުރެވިއްޖެއެވެ.
ރަޝިއާއަށް އެންމެ ފުރަތަމަ ބިންހެލުމެއް އައިސްފައިވަނީ ރެކްޓާ މިންގަނޑުން 8.8 މެގްނިޓިއުޑް ބާރުމިނުގައި އެގައުމުގެ އުތުރުގެ އައްސޭރިފަށުގެ ސަރަހައްދަށް ރޭ ފަތިހުގެ ވަގުތެއްގައެވެ.
އޭގެ ފަހުން 6.9 އާއި 6.3 ބާރުމިނުގެ ބިންހެލުން ރިކޯޑް ކުރެވިފައިވާއިރު، ބާކީ ބިންހެލުންތަކަކީ 5.0 އަށްވުރެ ބާރުގަދަ ބިންހެލުންތަކެއް ކަމަށް ވަނީ ރިކޯޑް ކުރެވިފައެވެ.
މިބިންހެލުންތަކާއި ގުޅިގެން ރަޝިއާ ހިމެނޭހެން ބައެއް ގައުމުތަކަށް ސުނާމީ އަރާފައިވާއިރު، ބައެއް ގައުމުތަކަށް ވަނީ ސުނާމީގެ އިންޒާރު ނެރެފައެވެ. ސުނާމީގެ އިންޒާރު ނެރެފައިވާ ގައުމުތަކުގެ ތެރޭގައި ރަޝިއާ، ޖަޕާން، ޓައިވާން، ފިލިޕިންސް، ޗައިނާ، ހަވާއީ، ގުއާމް، ޓޮންގާ، އެމެރިކާ، ކެނެޑާ، މެކްސިކޯ، ޕެރޫ އަދި އެކުއާޑޯ ހިމެނެއެވެ.
އެމެރިކާގެ ކެލިފޯނިއާ، އަލަސްކާ، އޮރެގަން، ވޮޝިންޓަނަށް ސުނާމީގެ އިންޒާރު ދީފައިވާއިރު، ކެނެޑާގެ ބްރިޓިޝް ކޮލަމްބިއާއަށް ވެސް ވަނީ ސުނާމީގެ އިންޒާރު ނެރެފައެވެ.
ސުނާމީގެ އިންޒާރު ނެރެފައިވާ ގައުމުތަކަށް މިރޭ 11:00 އާއި ހަމައަށް ސުނާމީގެ އިންޒާރު ދަންމާނެ ކަމަށް އެގައުމުގެ މޫސުން ލަފާ ކުރާ އިދާރާތަކުން ވަނީ ބުނެފައެވެ.
ރަޝިއާއަށް 47 ބިންހެލުން މިއަދު އައިސްފައިވާއިރު، އެގައުމަށް އައި 8.8 ގެ ބިންހެލުމަކީ ފާއިތުވި 14 އަހަރު ތެރޭގައި ވެސް އެގައުމަށް އައި އެެންމެ ބާރުގަދަ ބިންހެލުން ކަމަށް ރިޕޯޓްތަކުން ވަނީ ބުނެފައެވެ. މީގެ ކުރިން އެގައުމަށް އެންމެ ބާރުގަދަ ބިންހެލުން އައިސްފައިވަނީ 1952 ވަނަ އަހަރުއެވެ. އެއީ 9.0 ބާރުމިނުގެ ބިންހެލުމެކެވެ.
ކިޔުންތެރިންގެ ހިޔާލު