ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޑެޕިއުޓީ ސެކްރެޓަރީ ޖެނެރަލްގެ މަގާމަށް މުހައްމަދު ލަމްއާން މިއަދު އައްޔަންކޮށްފިއެވެ.
ޕީއެންސީން މިއަދު ވަނީ ލަމްއާން އެ މަގާމަށް ހަމަޖައްސާފައިވާކަން ރަސްމީކޮށް ހާމަކޮށްފައެވެ. ލަމްއާން އަކީ މިހާރުވެސް ސަރުކާރުގެ މުހިންމު މަގާމެއް ފުރުއްވަމުން ގެންދަވާ ބޭފުޅެކެވެ. އެގޮތުން އޭނާ މިހާރު ހުންނެވީ މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޑިރެކްޓަރުންގެ ބޯޑުގެ އެގްޒެކެޓިވް މެންބަރު އަދި އެ ކުންފުނީގެ ޑެޕިއުޓީ ސީއީއޯގެ މަގާމުގައެވެ.
ކުންފުނިތަކުގެ އިސް މަގާމުތައް ފުރުއްވާފައިވާ ލަމްއާން ވަނީ މީގެ ކުރިން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑެޕިއުޓީ މެނޭޖިން ޑިރެކްޓަރުގެ މަގާމުވެސް އަދާކުރައްވާފައެވެ.
ޕީއެންސީގެ އިދާރީ ހިންގުމަށް މި ބަދަލު ގެނެސްފައިވަނީ، ދާދިފަހުން ބޭއްވުނު ލޯކަލް ކައުންސިލް އިންތިހާބަށްފަހު އެ ޕާޓީގެ އެތެރޭގެ އޮނިގަނޑަށް ގެންނަމުންދާ ބަދަލުތަކުގެ ތެރެއިންނެވެ. މިގޮތުން، ޕާޓީގެ ސެކްރެޓަރީ ޖެނެރަލްގެ މަގާމުގައި ކުރިން ހުންނެވި މުއާޒް ހަލީމް ވަނީ މިދިޔަ މަހުގެ 18 ވަނަ ދުވަހު އެ މަގާމުން އިސްތިއުފާ ދެއްވާފައެވެ.
މުއާޒްގެ އިސްތިއުފާއާ ގުޅިގެން، ޕީއެންސީގެ ސެކްރެޓަރީ ޖެނެރަލްގެ މަގާމަށް މިހާރު އައްޔަންކޮށްފައިވަނީ މޫސާ ފަތުހީ އާދަމް އެވެ. ފަތުހީ އަކީ މީގެކުރިން ސިޓީސް އެންޑް ލޯކަލް ގަވަމެންޓް މިނިސްޓްރީގެ ސްޓޭޓް މިނިސްޓަރުގެ މަގާމު ފުރުއްވި ބޭފުޅެކެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިސްވެ ހުންނަވައިގެން ހިންގަވާ ޕީއެންސީގެ ހިންގުން ހަރުދަނާކުރުމަށްޓަކައި، ޕާޓީގެ އިސް މަގާމުތަކަށް ތަޖުރިބާކާރު ބޭފުޅުން އަންނަނީ އައްޔަންކުރަމުންނެވެ.
ކިޔުންތެރިންގެ ހިޔާލު