ކުރިމަތިފަރާތުގައި ފޮރުވައިގެން ދިވެހިރާއްޖެއަށް މަސްތުވާތާކެތި އެތެރެކުރި ދިވެހި އަންހެނަކު ހައްޔަރުކޮށްފިއެވެ.
ހަށިގަނޑުގައި ފޮރުވައިގެން ރާއްޖެއަށް މަސްތުވާތާކެތި އެތެރެކުރިކަމުގެ ތުހުމަތުގައި ހައްޔަރުކޮށްފައިވަނީ، މއ. މޯނިންވިޔު އާމިނަތު ޝަފަގު، 32އ އެވެ. އޭނާ ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށް ކްރިމިނަލް ކޯޓުން ވަނީ ބުރާސްފަތި ދުވަހު، 30 ދުވަހުގެ މުއްދަތެއް ޖަހައިފައެވެ.
އޭނާގެ ބަންދު އަމުރުން އެނގޭ ގޮތުގައި އޭނާގެ ކުރިމަތިފަރާތުގައި އެއްޗެއް ފޮރުވައިގެން އުޅޭ ކަމަށް އެކްސްރޭއިން ދައްކާތީ، އެއީ ކޯޗެއްތޯ ސުވާލުކުރުމުން އެއީ ކޮކެއިން ކަމަށް އޭނާ ވަނީ އެއްބަސްވެފައެވެ. އަދި، އޭގެ އިތުރުން އޭނާގެ ހަށިގަނޑާއި ޖިންސާ ދޭތެރޭގައި ވެސް ފޮރުވާފައި މަސްތުވާތަކެތި ހުއްޓައިވަނީ ފެނިފައެވެ.
ދިވެހިރާއްޖެއަށް 31 ގްރާމްގެ ކޮކެއިން އެތެރެކުރުމަކީ މަސްތުވާތަކެއްޗާ ބެހޭ ގާނޫނުގެ ދަށުން ވަރަށް ސީރިއަސް ކުށެކެވެ. މަސްތުވާތަކެއްޗާ ބެހޭ ގާނޫނުގެ 104 ވަނަ މާއްދާގެ ދަށުން، ޖަދުވަލު އެކެއްގައިވާ މަސްތުވާތަކެއްޗެއް ރާއްޖެއަށް އެތެރެކުރުމަކީ “މަސްތުވާތަކެތި ރާއްޖެއަށް އެތެރެކުރުމުގެ ކުށް” ކަމުގައި ބެލެވޭނެއެވެ.
ކޮކެއިންއަކީ މަސްތުވާތަކެއްޗާ ބެހޭ ގާނޫނުގެ ޖަދުވަލު އެކެއްގައި ހިމެނޭ ބާވަތެކެވެ. މިފަދަ އެއްޗެއްގެ ޖުމުލަ ބަރުދަނުގައި ފަސް ގްރާމު ނުވަތަ އެއަށްވުރެ ގިނަ ބަރުދަން ހުރިނަމަ، އެއީ “މަސްތުވާތަކެތި ވިޔަފާރިކުރުމަށްޓަކައި ރާއްޖެއަށް އެތެރެކުރުން” ކަމަށް ގާނޫނުލްއުގޫބާތުގެ ދަށުން ބެލެވޭނެއެވެ. އެގޮތުން، 31 ގްރާމަކީ މި މިންގަނޑަށްވުރެ މާ ގިނަ އަދަދެކެވެ.
އެހެންވެ، މި މައްސަލަ ސާބިތުވެއްޖެ ނަމަ އުމުރަށް ޖަލަށްލުމާ އެކު. 100,000 ރުފިޔާއާއި 10,000,000 ރުފިޔާއާ ދެމެދުގެ އަދަދަކުން ޖޫރިމަނާކުރާނެއެވެ. މި ފަދަ މައްސަލަތަކަކީ މުޖުތަމައުގެ ސަލާމަތަށް ނުރައްކާ ހުރި މައްސަލަތަކެއް ކަމަށް ބެލެވޭތީ، ޝަރީއަތް ނިމެންދެން ބަންދުގައި ބެހެއްޓުމުގެ ފުރުސަތު ވެސް އޮވެއެވެ.
މީހެއްގެ އަތުން ނުވަތަ އެ މީހެއްގެ ބާރުގެ ދަށުގައިވާ ތަނަކުން މިފަދަ ތަކެތި ފެނިއްޖެނަމަ، އެއީ އެ މީހަކު އެތެރެކުރި އެއްޗެއް ކަމަށް ގާނޫނީ ގޮތުން ގަރީނާ ކުރެވެއެވެ. މީގެން ބަރީއަވެވޭނީ އެއީ އެ މީހާގެ އެނގުމަކާ ނުލައި ހިނގާފައިވާ ކަމެއްކަން ކޯޓުގައި ސާބިތުކޮށްދެވިގެންނެވެ.
ކިޔުންތެރިންގެ ހިޔާލު