އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް ފީފާގެ ކޮވިޑް-19 ރިލީފް ފަންޑަށް ޚިޔާނާތްތެރިވި މައްސަލައިގައި އިއްވި 23 އަހަރުގެ ޖަލު ހުކުމް ހައިކޯޓުގައި އިސްތިއުނާފުކޮށްފިއެވެ.
ކްރިމިނަލް ކޯޓުން ބައްސާމްގެ މައްޗަށް 23 އަހަރުގެ ހުކުމް އިއްވީ މަނީ ލޯންޑަރިންގެ ކުށް ސާބިތުވެ 15 އަހަރާއި ޚިޔާނާތުގެ ކުށުގައި އަށް އަހަރާ އެކުގައެވެ. ކޮވިޑް-19 ރިލީފް ލޯނެއްގެ ގޮތުގައި ކްލަބުތަކަށް ފައިސާ ދިނުމަށް ފީފާއިން އެފްއޭއެމްއަށް ފޮނުވި 1.2 މިލިއަން ޑޮލަރު ބައްސާމް ބޭނުންކޮށްފައި ވަނީ އަމިން އެވެނިއުގެ ދެ ޕެންޓްހައުސެއް ގަތުމަށް ކަމަށް ޝަރީއަތުން ވަނީ ކަނޑައަޅައިފައެވެ. ޑޮލަރު މާރުކުރަން ކަމަށް ބުނެ އެފްއޭއެމްއިން ފައިސާ ނެރުމަށްފަހު އެ ފައިސާ އެޕާޓްމެންޓް ގަތުމަށް އަމިން އެވެނިއުއަށް ޖަމާކުރީ ކަމަށް ދައުވާގައިވެއެވެ.
މައްސަލަ ބެއްލެވި ގާޒީ މުހައްމަދު މިސްބާހު ވިދާޅުވި ގޮތުގައި އެއް މިލިއަން ޑޮލަރު މާރުކުރަން ކަމަށް ބުނެ އެފްއޭއެމްއިން އެ ފައިސާ ނެރެފައިވާ ކަމަށާއި، ޗެކެއް މެދުވެރިކޮށް ފައިސާ އަނބުރާ އެފްއޭއެމްއަށް ވެއްދި ނަމަވެސް އެއީ ސައްހަ ޗެކެއް ނޫން ކަމަށާއި އެ ފައިސާ އެފްއޭއެމްގެ އެކައުންޓަށް ވަދެފައިވާ ކަން ވެސް އެނގެން ނެތް ކަމަށެވެ. ގާޒީ ނިންމެވީ ފައިސާގެ އަސްލު އޮޅުވާލައި ބައްސާމް ޚިޔާނާތްތެރިވިކަން ޝަރީއަތަށް ސާބިތުވާ ކަމަށެވެ.
ބައްސާމްގެ ފަރާތުން މި ދެ މައްސަލަ ހައިކޯޓަށް ހުށަހަޅާފައިވީ ނަމަވެސް އެ މައްސަލަތައް ބަލައިގަތުމާ މެދު އެ ކޯޓުން އަދި ވަކި ގޮތެއް ނުނިންމައެވެ. ބައްސާމް މިހާރު ހުރީ ކުރިން އިއްވި ނުވަ އަހަރުގެ ހުކުމާއި ފަހުން އިއްވި 23 އަހަރުގެ ހުކުމާ އެކު ޖުމްލަ 32 އަހަރުގެ ޖަލު ހުކުމެއްގައެވެ.
ކިޔުންތެރިންގެ ހިޔާލު