އީރާނުގެ އިސްލާމިކް ރިވެލޫޝަނަރީ ގާޑް ކޯޕްސް (އައިއާރުޖީސީ) ގެ ކަނޑުގެ ސަފުތަކުގެ ކޮމާންޑަރު، އަލީރިޒާ ތަންގްސީރީ އަވަހާރަވެފައިވާކަން އެ ޖަމާއަތުން އިއުލާންކޮށްފިއެވެ. އައިއާރުޖީސީން ބުނާ ގޮތުގައި އޭނާ ޝަހީދުވީ އެމެރިކާއާއި އިސްރާއީލުން ގުޅިގެން ދިން ހަމަލާއެއްގައި ލިބުނު އަނިޔާތަކަށް ފަރުވާ ދެމުން ދަނިކޮށެވެ.
އައިއާރުޖީސީގެ ބަޔާނުގައިވާ ގޮތުން، ރިއަރ އެޑްމިރަލް ތަންގްސީރީ އަވަހާރަވީ ދާދި ފަހުން ދިން ހަމަލާއެއްގައި ލިބުނު ޒަޚަމްތަކަށް ހޮސްޕިޓަލުގައި ފަރުވާ ހޯއްދަވަމުން ދަނިކޮށެވެ. ނަމަވެސް، މި ހާދިސާ ހިނގި ވަގުތާއި ތަނުގެ ތަފްސީލެއް އެ ބަޔާނުގައި ހާމަކޮށްފައެއް ނުވެއެވެ. އަދި މިކަމާ ގުޅޭ މިނިވަން އެއްވެސް މަސްދަރަކުން މިހާތަނަށް މި މައުލޫމާތު ކަށަވަރުކޮށްދީފައެއް ނުވެއެވެ.
ތަންގްސީރީއަކީ އީރާނުގެ ކަނޑުގެ އަސްކަރީ ސްޓްރެޓެޖީ އެކުލަވާލުމުގައި، ހާއްސަކޮށް ހޮރްމުޒް ކަނޑުއޮޅީގައި އައިއާރުޖީސީން ހިންގާ ހަރަކާތްތަކުގައި އެންމެ އިސް ދައުރެއް އަދާކުރެއްވި އެއް ބޭފުޅާއެވެ. އޭނާގެ ބެލުމުގެ ދަށުން އެ ސަރަހައްދުގައި އީރާނުގެ އަސްކަރީ ބާރު ދެއްކުމާއި، ހަލުވި ހަމަލާތައް ދޭ އުޅަނދުފަހަރު ބޭނުންކޮށްގެން ހިންގާ އޮޕަރޭޝަންތައް ވަނީ ވަރުގަދަކޮށްފައެވެ.
މި ޚަބަރު ކަށަވަރުވެއްޖެ ނަމަ، މިއީ ފަހުގެ ތާރީޚެއްގައި އީރާނުގެ އަސްކަރިއްޔާގެ އެންމެ މަތީ ފަންތީގެ ވެރިއަކު އަވަހާރަކޮށްލެވުނު ފުރަތަމަ ފަހަރަށް ވާނެއެވެ. މިއީ ސަރަހައްދީ މަސްލަހަތު އިތުރަށް ގޯސްވެ، މަސްރަހު ނުތަނަވަސްވެގެންދާނެ ކަމެއް ކަމަށް މުހައްލިލުން ދެކެއެވެ. އަދި އީރާނުގެ ދިފާއީ ނިޒާމުގައި އައި.އާރު.ޖީ.ސީ ނޭވީގެ މުހިންމުކަމަށް ބަލާއިރު، މީގެ ބަދަލުހިފުމުގެ ގޮތުން ތެހެރާނުން ވަރުގަދަ ފިޔަވަޅުތަކެއް އަޅާފާނެ ކަމުގެ އިންޒާރުވެސް މުހައްލިލުން ދެއެވެ.
މި ހަމަލާއާ ގުޅޭގޮތުން އެމެރިކާގެ ވޮޝިންގޓަނުން ނުވަތަ އިސްރާއީލުގެ ތެލް އަވީވުން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ. ނަމަވެސް އިސްރާއީލުގެ އޮފިޝަލަކާ ހަވާލާދީ އެ ގައުމުގެ މީޑިއާތަކުން މި މަހުގެ 26 ވަނަ ދުވަހު ރިޕޯޓްކޮށްފައިވާ ގޮތުގައި، އަލީރިޒާ ތަންގްސީރީ އަވަހާރަވީ ބަނދަރު އައްބާސްގެ އައްސޭރިފަށުގެ ސަރަހައްދަކަށް އެމެރިކާ އާއި އިސްރާއީލުން ގުޅިގެން ދިން ހަމަލާއެއްގައެވެ.
ކިޔުންތެރިންގެ ހިޔާލު