އީރާނުގެ ވެރިރަށް ތެހެރާންގައި ހުންނަ ޕާކިސްތާނުގެ އެމްބަސީ ކައިރިއަށް، އިޒްރޭލާއި އެމެރިކާ ގުޅިގެން ބުރާސްފަތި ދުވަހު ދިން ކަމަށް ބުނާ ހަމަލާތަކާ ގުޅިގެން ޕާކިސްތާނުން ވަރުގަދަ އިންޒާރެއް ދީފިއެވެ. ޕާކިސްތާނުން ބުނި ގޮތުގައި އީރާނުގައި ނުވަތަ ދުނިޔޭގެ ކޮންމެ ތަނެއްގައި ތިބި އެ ގައުމުގެ ޑިޕްލޮމޭޓުންނަށް އެއްވެސް ގެއްލުމެއް ލިބިއްޖެ ނަމަ، އޭގެ ރައްދު ވަރަށް ވަރުގަދައަށް ދޭނެކަމަށެވެ.
ޕާކިސްތާނުގެ ސަރުކާރާ ގުޅުން އޮންނަ ‘ޕާކިސްތާން ސްޓްރެޓީޖިކް ފޯރަމް’ އިން ނެރުނު ބަޔާނެއްގައި ބުނެފައިވަނީ، “އިޒްރޭލުން ހަނދާން ކުރަންޖެހޭ ކަމަކީ ޕާކިސްތާނަކީ ގަތަރެއް ނޫން ކަމެވެ. ދުނިޔޭގެ ކޮންމެ ތަނެއްގައި ތިބި އަޅުގަނޑުމެންގެ ޑިޕްލޮމޭޓަކަށް ގެއްލުމެއް ދީފި ނަމަ، އެކަމުގެ ބަދަލު ވަރަށް ހިތިކޮށް ހިފާނަމެވެ.”
މި އިންޒާރު ދީފައިވަނީ ބުރާސްފަތި ދުވަހު ތެހެރާންގެ މެދުތެރޭގެ ސަރަހައްދުތަކަށް އިޒްރޭލާއި އެމެރިކާއިން ވައިގެ ހަމަލާތަކެއް ދިން ކަމުގެ ރިޕޯޓުތައް ފެތުރިފައިވާ ދަނޑިވަޅެއްގައެވެ. މި ހަމަލާތައް އަމާޒުވި ސަރަހައްދުތަކުގެ ތެރޭގައި ޕާކިސްތާނުން އީރާނަށް ކަނޑައަޅާފައި ހުންނަ ސަފީރުގެ ރަސްމީ ގެކޮޅާއި އެމްބަސީ ހުންނަ ސަރަހައްދު ހިމެނެއެވެ.
ލިބިފައިވާ މައުލޫމާތުތަކަށް ބަލާއިރު، އެމްބަސީގެ އިމާރާތަށާއި ޑިޕްލޮމެޓިކް މުވައްޒަފުންނަށް އެއްވެސް ގެއްލުމެއް ލިބިފައެއް ނުވެއެވެ. ނަމަވެސް، އެ ސަރަހައްދުގައި ގޮވި ބާރުގަދަ ގޮވުންތަކުގެ ސަބަބުން ކައިރީގައި ހުރި ބައެއް އިމާރާތްތަކަށް ލޮޅުން އަރާފައިވާ ކަމަށް ރިޕޯޓުތައް ބުނެއެވެ.
މި ހަމަލާ ދީފައިވަނީ ޕާކިސްތާނަށް ވަރަށް ނާޒުކު ވަގުތެއްގައެވެ. އެއީ އެމެރިކާއާއި، އިޒްރޭލާއި އީރާނާ ދެމެދު މެދުވެރިއެއްގެ ދައުރު އަދާކުރުމަށް ޕާކިސްތާނުން މަސައްކަތް ކުރަމުންދާ ދަނޑިވަޅަކަށް ވާތީއެވެ. ޕާކިސްތާނުގެ އޮފިޝަލުން މީގެ ކުރިން ވިދާޅުވެފައިވަނީ، ދެ ފަރާތުން ވެސް އެދޭ ނަމަ އެމެރިކާއާއި އީރާނާ ދެމެދު ބާއްވާ މަޝްވަރާތަކަށް އިސްލާމްއާބާދުން މަރުހަބާ ކިޔާނެ ކަމަށެވެ.
ކިޔުންތެރިންގެ ހިޔާލު