އިރާނުގެ ވަރުގަދަ ހަމަލާތައް މަތަކުރުމަށް ޓަކައި ބޭނުންކުރަމުންދާ ޑިފެންސް މިސައިލްތައް ހުސްވާން އުޅޭތީ އިތުރު މިސައިލް ހޯދައިދެން އެމެރިކާގެ ކިބައިން ސަހްޔޫނީ އިޒްރޭލުން އެދިއްޖެއެެވެ.
އިޒްރޭލުން ހާމަކުރި ގޮތުގައި އެ މީހުން އަތުގައި ހުރި ބެލިސްޓިކް މިސައިލް އިންޓަސެޕްޓަރުތަކުގެ އަދަދު ވަނީ ނުރައްކާތެރި މިންވަރަކަށް މަދުވެފައެވެ.
މި ދިޔަ އަހަރު ވެސް އިރާނާއެކީ ހަމަލާތައް ބަދަލު ކުރުމުން އިޒްރޭލުގެ ޑިފެންސް މިސައިލްތައް ފުދޭވަރަކަށް މަދުވެފައިވާތީ, ދެވަނަ ފަހަރަށް ހަނގުރާމަ ފެށިއިރު އިޒްރޭލުގެ ޑިފެންސިވް ކެޕޭސިޓީ އޮތީ އެހާ ރަނގަޅު ހާލަތެއްގައެއް ނޫނެވެ.
މީޑިއާތަކުން ރިޕޯޓުކުރާ ގޮތުގައި އިރާނުން ދެމުން އަންނަ ހަމަލާތަކަކީ އިޒްރޭލާއި އެމެރިކާއިން އަންދާޒާ ކުރި ވަރަށްވުރެ ވަރުގަދަ އަދި ދިގުދެމިގެންދާ ހަމަލާތަކަކަށްވާތީ, ހީކުރި ވަރަށްވުރެ ގިނައިން ޑިފެންސިވް މިސައިލް ބޭނުން ކުރަން އިޒްރޭލަށް ވަނީ ޖެހިފައެވެ.
މީގެ އިތުރުން އިރާނުން ބޭނުން ކުރަމުން އަންނަ ކްލަސްޓާ މިސައިލް (އެކި ބައި ބަޔަށް ބެހިގެންދާ މިސައިލް) ތައް މަތަކުރަން އުނދަގޫވުމުގެ ސަބަބުން އިޒްރޭލު އަތުގައި ހުރި ޑިފެންސިވް މިސައިލްތަކުގެ ބޮޑު އަދަދެއް ވަނީ ބޭކާރުވެފައެވެ.
އެމެރިކާގެ އޮފިޝަލެއް ވަނީ އިޒްރޭލުގެ ޑިފެންސް މިސައިލްތައް މަދުވަމުން އަންނަ ކަން ޔަގީން ކޮށްދީފައެވެ. ނަމަވެސް އިޒްރޭލަށް އިތުރު މިސައިލް އިންޓަސެޕްޓަރުތައް ފޮނުވާނެ ކަމަށް އެމެެރިކާއިން އަދި ހާމަކޮށްފައެއް ނުވެއެވެ.
ކިޔުންތެރިންގެ ހިޔާލު