2026 ވަނަ އަހަރު އެޕްރިލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިޔު.ޑީ.ސީ) ގެ އިންތިޚާބަށް ކެންޑިޑޭޓުން ހޮވުމަށް މިއަދު، 16 ޖެނުއަރީގައި ބޭއްވި އެމްޑީޕީގެ ޕްރައިމަރީ ކާމިޔާބު ކުރެއްވި ހުރިހާ ކެންޑިޑޭޓުންނަށް އެ ޕާޓީގެ ރައީސް ޢަބްދުﷲ ޝާހިދު މަރުޙަބާ ވިދާޅުވެއްޖެއެވެ.
މިއަދު، 16 ޖެނުއަރީގައި ބޭއްވި ލޯކަލް ކައުންސިލް އިންތިޚާބު 2026 އާއި ޑަބްލިޔު.ޑީ.ސީ ގެ ޕްރައިމަރީގައި ވާދަކޮށް ކާމިޔާބު ހޯއްދެވި ހުރިހާ ކެންޑިޑޭޓުންނަށް މަރުޙަބާ ދަންނަވަން.
މި އިންތިޚާބުގައި އެމްޑީޕީގެ ރޫޙުގައި ޖޯޝާއި ފޯރިއާއި އެކު ވާދަކުރެއްވި އެންމެހާކެންޑިޑޭޓުން ދެއްކެވި…
— Abdulla Shahid (@abdulla_shahid) January 16, 2026
ޝާހިދު މިއަދު ކުރެއްވި އެކްސް ޕޯސްޓެއްގައި ވިދާޅުވީ، މި އިންތިޚާބުގައި އެމްޑީޕީގެ ރޫޙުގައި ޖޯޝާއި ފޯރިއާއެކު ވާދަކުރެއްވި އެންމެހާ ކެންޑިޑޭޓުން ދެއްކެވީ ޑިމޮކްރަސީގެ ރީތި ނަމޫނާއެއް ކަމަށެވެ. އަދި އެކަމަށްޓަކައި ހުރިހާ ކެންޑިޑޭޓުންނަށް ޝުކުރު އަދާކުރައްވާ ކަމަށްވެސް އޭނާ ވިދާޅުވިއެވެ.
މީގެއިތުރުން، ޕާޓީގެ ރައީސް ޝާހިދު ފާހަގަކުރެއްވި ގޮތުގައި ދެން އޮތީ ޕްރައިމަރީ ކާމިޔާބު ކުރެއްވި ކެންޑިޑޭޓުންނާއެކު އެންމެން އެކަތިގަނޑެއްގެ ގޮތުގައި މަސައްކަތް ކުރުމެވެ. އޭނާ ވިދާޅުވީ މުޅި ޕާޓީ އެކުގައި ނިކުމެ، މިހާރުގެ ސަރުކާރަށް “ބޮޑުތަނުން ނޫނެކޭ ބުނަން” ޖެހޭ ކަމަށެވެ.
މި ޕްރައިމަރީ އޮމާންކަމާއެކު ކުރިއަށް ގެންދިއުމުގައި ކެންޑިޑޭޓުންނާއި އެ ބޭފުޅުންގެ ޓީމުތަކުން ދެއްކެވި މަސައްކަތަށް ޝާހިދު ވަނީ ތައުރީފު ކުރައްވާފައެވެ. އަދި ޕާޓީގެ ޗެއާޕާސަން އަބްދުލް ޢަފޫރު މޫސާގެ އިތުރުން، އިންތިޚާބާ ބެހޭ ކޮމިޓީގެ މެންބަރުންނާއި، ސެކްރެޓޭރިއެޓްގެ މުވައްޒަފުން، ޤައުމީ މަޖިލީހުގެ މެންބަރުން އަދި ގިނަ އަދަދެއްގެ ވޮލަންޓިއަރުން ކުރެއްވި އަގުހުރި މަސައްކަތަށް ޝާހިދު ވަނީ ފަށްފަށުން ޝުކުރު އަދާކުރައްވާފައެވެ.
ކިޔުންތެރިންގެ ހިޔާލު