ބައިނަލް އަގުވާމީ ސުލްހައިގެ ނޮބެލް އިނާމު ނުވަތަ ނޮބެލް ޕީސް އެވަރޑަށް އެމެރިކާގެ ރައީސް ޑޮނަލްޑް ޓްރަމްޕް ނޮމިނޭޓްކޮށްފިއެވެ. ޓްރަމްޕްގެ ނަން މި އެވަރޑަށް ހުށައަޅާފައިވަނީ އިސްރާއީލުގެ ބޮޑުވަޒީރު ބެންޖަމިންގ ނަތަންޔާހޫއެވެ.
ނަތަންޔާހޫ ޓްރަމްޕަށް ނޮމިނޭޝަން ސިޓީ ހަވާލުކޮށްދެއްވީ މިހުސްވި ހަފްތާ ކުރީކޮޅު ވައިޓް ހައުސްގައި ބޭއްވި ބައްދަލުވުމެއްގެ ތެރެއިންނެވެ. ނަތަންޔާހޫ ވިދާޅުވީ ޓްރަމްޕަށް މި އެވަރޑް ލިބުން ހައްގުކަމަށެވެ. އަދި ނަތަންޔާހޫ އަށް ޖަވާބު ދެއްވަމުން “ވާއު… މިއީ ވަރަށް މާނަހުރި ކަމެއް” ކަމަށް ޓްރަމްޕް ވިދާޅުވިއެވެ.
ނޮބެލް ޕީސް އެވަރޑަށް އެމެރިކާގެ ރައީސް ޑޮނަލްޑް ޓްރަމްޕް ނޮމިނޭޓްކުރުމާ ގުޅިގެން ތަފާތު ރިއެކްޝަންތަކެއް ވަނީ އުފެދިފައެވެ. ސަޕޯޓަރުން ބުނާ ގޮތުގައި އެއީ ދެ ލީޑަރުންގެ މެދުގައި އޮންނަ ވަރުގަދަ ގުޅުމެއް ދައްކުވައިދޭ ކަމެކެވެ. އަދި މިކަމަށް ފާޑުކިޔާ މީހުން ބުނަނީ ޓްރަމްޕަށް އެ އެވަރޑް އެކަށީގެން ނުވާ ކަމަށާއި، ހާއްސަކޮށް ޣައްޒާގައި ހިންގަމުންދާ ހަނގުރާމައިގެ ޖަރީމާތަކުގެ ފަހަތުގައި އެމެރިކާ އޮތްކަމަށް ތުހުމަތުކުރާއިރު، މިއީ ޓްރަމްޕަށް ހައްގު އެވަރޑެއްކަމަށް އެމީހުން ނުދެކެއެވެ.
ބައެއް ތަޖުރިބާކާރުން ގަބޫލުކުރާ ގޮތުގައި މި ނޮމިނޭޝަނަކީ އިސްރާއީލުން ޣައްޒާގައި ހިންގަމުންދާ ހަނގުރާމައާއި ދާދި ފަހުން އީރާނާ ދެކޮޅަށް ކުރި ހަމަނުޖެހުންތަކާ ގުޅިގެން ޕްރެޝަރު ބޮޑުވަމުންދާ ދަނޑިވަޅެއްގައި ޓްރަމްޕްގެ ތާއީދު ހޯދުމަށް ނަތަންޔާހޫ ގެންގުޅުއްވާ އުކުޅެކެވެ.
ކިޔުންތެރިންގެ ހިޔާލު